NAF muittuha olbmuid ahte jus fal leat vánddardeame báikkiin gos lea muohta, de galget dálvedeahkat leat biillas, erenoamážit jus áigu vuolgit báikkiide gosa lea dieđihan muohttaga.
Jus leat duoddarii dahje várrái vahkkoloahpas biillain, de sáhttá leat nu ahte berret molsut dálvedeahkaid dál juo.
– Jus lea dieđihuvvon borga doppe gosa lea vuolgime, de galget dálvedeahkat biillas. Dan lohká NAF gulahallanráđđeaddi, Jan Ivar Engebretson.
Son lohká vaikke vel lea ge dieđihuvvon fiertu ja bivval, jus lea vuolgime báikkiide gos sáhttá muohttit, de lea buoret dál juo molsut dálvedeahkaid.
Molsso
Engebretson lohká ahte lea buoret molsut oktii beare olu, go deahkat fertejit leat siivui heivehuvvon.
Das son oaivvilda ahte jus lea geassesiivu, de ii berre gal dálvedeahkaiguin vuodjit, go dat leat arvat heajubut geassesiivvus go geassedeahkat.
– Sáhttá leat nu ahte šaddá fas geassedeahkaid molsut ovdal go duođaš dálvá, muhto daga dan, go de leat sihkaraston rivttes deahkat rivttes siivui, lohká son vel loahpas.
