Korona áigi lea dagahan lassi bargu postii. Jus siđat juovlaskeaŋkka ollet rivttes áigái, fertet leat árrat jođus.
– Obbalaččat mii vásihat páhkkahivvodagat lassánit. Mii ávžžuhat olbmuid árrat sáddet páhkaid ja nu árrat go vejolaš viežžat páhkaid poastabáikkis. Go mis han lassána páhkkahivvodat vel sakka dás ovddos guvlui, dadjá Posten Norge preassahoavda Kenneth Pettersen Ávvirii.
Neahttagávppašeapmi
Sivvan manin hivvodat lea lassánan lea go neahttagávppašeapmi lea lassánan koronaáigge, muitala son.
– Juovllaid ja «Black friday» lassána sakka vel neahttagávppašeapmi, ja dasa lassin olbmot vel sáddegohtet skeaŋkkaid, dadjá Pettersen gii lohká korona dagahit lassáneami.
– Olbmot leat várrogasat dán áigge, dadjá son.
Suddjen
Norggas lea pandemiija jođus ja son muitala sii leat liigevárrogasat dán jagi. Earret eará leat sii čavgen ieaset bargosajiin njuolggadusaid.
– Mii suddjet iežamet bargiid. Eat hálit njoammuma leavvat midjiide. Dat váikkuhivččii postii garrasit, dadjá son.
