Nilut Cup čiekčamat álget odne Báktehárjjis Guovdageainnus. Mii jearaimet muhtun spábbačiekčanberošteaddjin makkár joavkku jáhkket vuoitit.
Nilut Cup čiekčamat álget odne Báktehárjjis Guovdageainnus. Mii jearaimet muhtun spábbačiekčanberošteaddjin makkár joavkku jáhkket vuoitit.
Čiekčamat álget odne diibmu logi váile guđas eahkedis. Dál lea vuosttaš háve go čiekčamat lágiduvvojit futsal vuogi mielde. Dán jagáš čiekčamiidda leat dieđihuvvon 19 dievdojoavkku ja gávcci nissonjoavkku.
Team Nilut buoremus
Láhppoluobbalaš Anders Aslak Gaino lea 2005 rájes jahkásaččat searvan Nilut Cupa spábbačiekčamiidda Nagirváre Lunttaid joavkku joavkojođiheaddjin. Dán háve son lea Nagirváre Reaŋggaid ja Nagirváre Nieiddaid joavkkuid jođiheaddji maiddái. Su oainnus Nilut Cupa spábbačiekčamiid buoremussan sáhttá šaddat Team Nilut joavku.
– Mun gal doaivvun Team Nilut vuoitá. Visot eará go vuoitu sidjiide lea heahpat. Sis leat Norgga alimus divišuvnna ja vuosttaš divišuvnna čiekčit, ja jus eai vuoitte, de gal lea veaháš ártet, čilge Gaino Ávvirii.
Nagirváre Lunttat beallefinálii
Nagirváre Lunttaid joavkojođiheaddji oainnu mielde iežas joavku olle beallefinálii.
– Eará joavkkut maid jáhkán ollet beallefinálii leat Team Skånland, Nagirváre Lunttat ja Johansens utvalgte. Jus galgá hupmat iežan joavkku birra, de mis lea buorre joavku ja mii lávet ollet dohko. Nu movt loahppačiekčan lea biddjon dán jagi, de jáhkán mis lea buorre vejolašvuohta beassat dohko. Beallefinálas ovddasguvlui lea hui rabas gii beassá finálii, lávejit hui dassálaga joavkkut, čilge Aslak Anders Gaino.
Jáhkká dáid buoremus čiekčin
Nagirváre Lunttaid, Nagirváre Reanggaid ja Nagirváre Nieiddaid joavkojođiheaddji oaivvilda dát sáhttet šaddat buoremussan.
– Lea somá oaidnit man buorre Brann čiekci Kristoffer Barmen lea. Earát geaid jáhkán dahkat bures leat Ibba Lajaab Team Skániid joavkkus ja Svein Ove Thomassen Johansens Utvalgte joavkkus, muitala Nagirváre Lunttaid joavkojođiheaddji Aslak Anders Gaino.
Ávvir jearrá makkár joavkku jáhkká guđege vuoitit dán jagi Nilut Cup čiekčamiid.
– Dievdduid bealde orru Team Skånland buorre joavku. Nu lea Team Nilut maid. Juobbá dien guovttis vuoitá dievdduid čiekčamiid, muitala guovdageaidnulaš spábbačiekčanberošteaddji Johan Aslak Pulk Ávvirii.
– Team Skånland. Orru hui garra joavku ja olu elihtačiekčit futsal suorggis, muitala kárášjohkalaš Geir Michael Boine.
– Na dat gal golbma joavkku geaid mun jáhkán leat Skánit joavku, ja de muhtun Nilut joavkkuin dahje Nagirváre Lunttat. Danne go dat lávejit álo bajimusas, muitala Odd Mathis Hætta.
– Badje-Deanu Football Club! Dat lea buoremus Sámi spáppačiekčanjoavku dán máilmmis! Dat leat nu buorit ahte vaikko eai leat mielde Nilut Cupas, de sihkkarit vuitet aŋkke, buriin movttain čilge Niilas Beaska Ávvirii.
– BUL Doser
Ná lohke measta ovttajienalaččat buot spábbačiekčanberošteaddjit go Ávvira journalista jearai makkár nissonjoavku jáhkket vuoitit Nilut Cupa dán jagi.
– Jáhkán BUL Doser vuoitá nu go diibmá ge. Eará joavkkut mat sáhttet dahkat bures leat Goaldiggers, PSG ja Nagirváre Nieiddat, čilge Nagirváre Lunttaid, Nagirváre Reaŋggaid ja Nagirváre Nieiddaid joavkojođiheaddji Aslak Anders Gaino. Son lasiha vel:
– Elin Løvstad bahčá eanemus moalaid ja Hege Christine Kvålshagen šaddá buoremus čiekči, lohká Gaino.
Seamma oaivilat leat eará spábbačiekčanberošteddjiin maid.
– Bul-doser go doppe leat olu buorit čiekčit, ja olu čiekčan ovttas. Nubbin finálajoavkun jáhkán Goaldiggers jus eai deaivvat ovdal, čilge Geir Michael Boine.
– Nissonjoavkkuid in duostta árvádallat. Muhto BUL Doseris orrot buorit čiekčit, lohká Johan Aslak Pulk Ávvirii.
