Diet garra oaivilat bohtet Suohpanterror dáiddajoavkkus, mii lea sádden poastakoarttaid suoma riikkabeaivveáirasiidda, gos bivdet sin hilgot soahpamuša.
Diet garra oaivilat bohtet Suohpanterror dáiddajoavkkus, mii lea sádden poastakoarttaid suoma riikkabeaivveáirasiidda, gos bivdet sin hilgot soahpamuša.
Suohpanterror-dáiddárkollektiiva lea sádden Suoma riikkabeaiáirasiidda poastakoarttaid main garra sániiguin ja govaiguin ovddidit iežaset oaiviliid Deanusoahpamuššii.
Poastakoarttas heaŋgába guokte sápmelačča, harcejuvvon Sámi šaldái.
– Deanu soahpámuš lea vuolláičállojuvvon gulakeahttá eamiálbmoga ja Sámedikkiid. Jus bealuštat Deanu soahpamuša leat ollašuhttimin sámekultuvrra álbmotgoddima, čuožžu koarttas.
Dasa lassin lea Suohpanterror maiddái ráhkadan filmmaža man leat juohkán facebook-bokte, mas ovdanbuktet dan seamma. Filmma oainnát bajimusas.
Bilidit kultuvrra vuođu
Jenni Laiti guhte lea dáiddárkollektiivva gulahallanolmmoš muitala ahte sin oainnu mielde árvaluvvon Deanu–soahpamuš, gáržžida nu sákka báikkálaš olbmuid árbevirolašbivddu ahte dat «rohtte láhtteránu» sápmelaččaid julggiid vuolde eret.
– Olbmot eai sáhte šat bivdit. Luossabivdu lea olles dien guovllu kultuvrra vuođđu ja dáinna soahpamušain bilidit dan vuođu, čuoččuha Laiti.
(Ášši joatká gova vuolábealde)
Govva: Suohpanterror
– Sávvet soahpamuša bissehuvvot
Laiti muitala iežaset leat hui fuolas ja sávvet soahpamuša bissehuvvot.
Sihke Norga ja Suopma leat jo vuolláičállán šiehtadusa, muhto Stuorradiggi ja Riikkabeaivi galget vel dohkkehit dan, Laiti sávvá parlameantaáirasiid hilgut soahpamuša.
Jáhkká ávkki
Vaikke soahpamuš lea jo vuolláičállon, iige galgga eará go dohkkehuvvot vel, de Laitis lea doaivva ahte nagodit gomihit dan.
– Suoma Sámediggi lea váidán ášši vuoigatvuohtakansliijai, ja Norgga beale Sámedikkis leat maid iežas proseassat jođus, seammás go bivdogottit leat maid váidalan soahpamuša. Mun jáhkán ahte jus geavahat olu sierralagan vugiid de das lea ávki. Jus sihke politihkalaččat, kultuvrralaččat ja dáiddalaččat ovddidat ášši de sáhttit gomihit soahpamuša, lohká son.
