Sámediggi lea jođiheame proseassa gos heargevuodjinsearvvit SHL ja SVL-N galget oktiičaskojuvvot ovtta searvin. Sámediggeráđđeláhttu Lars Filip Paulsen čilge ahte heajos ovttasbargu servviid gaskkas lea okta ágga manne leat álggahan barggu.
Sámediggi lea jođiheame proseassa gos heargevuodjinsearvvit SHL ja SVL-N galget oktiičaskojuvvot ovtta searvin. Sámediggeráđđeláhttu Lars Filip Paulsen čilge ahte heajos ovttasbargu servviid gaskkas lea okta ágga manne leat álggahan barggu.
Sámediggi lea jođiha ovttastahttibarggu Sámi Heargevuodjin lihttu(SHL) ja Sámi Valáštallan Lihtu-Norga (SVL-N) gaskkas.
Evttohus lea gárvvis, movt ovttastahttit heargegilvvuid oktasaš lihttun.
Nanneme sámi valáštallama
Dat lea ge okta ákkaiguin manne sámediggi lea dán proseassa álggahan.
Sámediggeráđđeláhttu Lars Filip Paulsen čilge ahte go leat hástalusat leamaš heargevuodjingilvvuid lágidemiid oktavuođas, de livčče ávkkálaš ahte lea okta lihttu mii lágida heargevuodjimiid, ii ge guokte nu mo odne leat.
– Leat hástalusat leamašan go leat guokte lágideaddji, ja go eai leat leamaš ovttaoaivilvuođat muhtin áššiin. Jurddašan ahte jus galgá nannet sámi valáštallama, de lea buorre jus lea duššo okta lihttu mii bargá heargevuodjimiiguin, lohká son.
Ii buorre ovttasbargu
Lei ovddit sámediggeráđđi mii álggahii barggu, geahčadit sámi valáštallama organiserema.
– Nu go mun dovddan ášši, de ii leat ovttasbargu leamaš buot buoremus SHL ja SVL-N gaskkas, gilvvuid lágidemiid oktavuođas. Danne leat mii joatkime organiserenbarggu, čohkket servviid oktii, lohká Paulsen.
SVL-N vuolde leat sihke čuoigamat, njorostallamat, spábbačiekčan ja heargevuodjimat.
SHL ges lea čielga heargevuodjin searvi.
– Jus ii leat nu buorre ovttasbargu, lea go de buorre jurdda oktiičaskit?
– Poeaŋga lea ahte, mu dieđu mielde, ii leat leamaš buorre ovttasbargu gilvvuid lágidemiin. Jurdda lea maid ahte SVL-N sáhttá luoitit dan oasi, ja ahte SHL, mii lea čielga heargevuodjinsearvi, šaddá dat searvi oktasaš organisašuvnnas mii doaimmaha heargevuodjimiid. Dat lea jus mii nagodit čohkket sámi valáštallamiid ovtta searvái, vástida Paulsen.
Eaktu ahte bohtet ovttaoaivilii
Maiddái FA Sápmi lea mielde ovttastahttimis, dan oasis mii guoská spábbačiekčamii.
Jurdda lea čohkket daid golbma sámi valáštallanservviid ovtta searvin.
Son deattuha ahte ii leat jurdda čohkket servviid SVL-N vuollai. Muhto jus ovttastahttin meinestuvvá, galgá SVL-N jođihit álgobarggu. Dasto galget searvvit ovtta dásis ođđa lihtus.
Paulsen mielas leat čoahkkimat mat dássážii leat leamaš, leamaš hui positiivvalaččat.
– Dat lea proseassa, gos mii geahččat organiserema, mii eat leat vel olahan makkárge loahppabohtosa. Sámedikki bealis lea sávaldat geahččat sámi valáštallama organiserema. Oktiičaskin lea min mihttu, muhto eaktun dasa lea ahte searvvit mihtet, lohká Paulsen.
