-Almmuhus-
-Almmuhus-
SMÁVVAOĐĐASATJuovla­ruohtas dáhpá­huvvet eanemus buollin­lihkohisvuođat

Juovla­ruohtas dáhpá­huvvet eanemus buollin­lihkohisvuođat

-

-

Juovlamánnu lea dat mánnu goas eanemus buollindáhpáhusat gevvet. Diibmá ledje eanemus buollimat juovlaruohta, oktiibuot 26 buollima.  Dasa lassin ledje vel 81 buollima ovdal ođđabeairuohta.

Torbjørn Brandeggen, gii lea gulahallanráđđeaddi Tryg Forsikringas, muitala ahte juovlaáigodat lea áigi go dolla dávjá cahkkehuvvo. Olbmot cahkkehit olu gintaliid, ja gievkkaniin lea olu buoiddes juovlabiebmu mii steikejuvvo dahje vuššo.

– Go bearaš čoahkkana de sáhttá jođánit vajálduhttit ommana. Buollindáhpáhusat mat gevvet juovllaid áigge gártet earenoamáš lossadin oapmahaččaide, ja mii ávžžuhit buohkaid leahkit várrogasat dolain ja gintaliiguin. Gievkkana maid ii ábut guođđit go lea ráhkadeame biepmu, lohká Brandeggen.

Lassáneapmi lea vuorjašuhtti

Diibmá registrerii dáhkádussuorgi badjel 27 000 vahágiid maŋŋel go priváhta ruovttuin lei buollán. Finans Norge logut čájehit ahte oktiibuot lei badjel 2,5 miljárdda ruvnno máksámuš daid geažil. Dán jagi leat sihke dáhpáhusat ja máksámušat lassánan 15 proseanttain.

– Dát lassáneapmi lea vuorjašuhtti, ja mii oaidnit dán jagi maid ahte juovlamánus leat eambbo buollindáhpáhusat go muđui jagis. Maŋemus vihtta jagi leat buollindáhpáhusat juovlamánus lassánan 17 proseanttain, go buohtastahttá olles jagiin, lohká Brandeggen.

45 olbmo dušše buollimis diibmá. Servodatsihkarvuođa ja gearggusvuođa direktoráhta (DSB) logut čájehit ahte dán rádjai jagis leat 38 olbmo duššan buollimiin, 21 dievdoolbmo ja 17 nissonolbmo. 

Buorit rávvagat buollima ektui

– Leage ráhkkanan dasa ahte sáhttá buollát.

– Iska dávjá ahte buollinbiškunapparáhtat doibmet. Geavat fal ráidočadnojuvvon buollinbiškunapparáhtaid.

– Čađat buollinhárjehusa ruovttus. Čájet mánáide gosa galget báhtarit jus buollá.

– Jáddat juovlačuovggaid ihkku, ja ovdal go manat olggos viesus.

– Ale goassege guođe buolli gintaliid. Iska álo leat go jáddaduvvon.

– Garvve čiŋaid mat sáhttet álkit buollát.

– Iska elektrovnnalaš rusttegiid, ja ale gievdda rávnnjeneahta.

– Várut ahte it geavat beare olu joatkkajohtasiid.

– Jáddat ommana, bassanmašiinna ja bivttasgoikadanmašiinna ihkku, dahje go ieš it leat ruovttus.

– Ommanalárpma gánnáha geavahit.

– Jus buollá, de ferte dán muitit: Gádjut – Dieđihit 110 – Čáskadit dola

-Almmuhus-