-Almmuhus-
OĐĐASATJuovlajoga ođđa šaldi rahppo 

Juovlajoga ođđa šaldi rahppo 

-

-

Mánnodaga rahppo Juovlajoga ođđa šaldi Fylkkaluodda 8082:s. Sihke skuvlamánát ja giliolbmot servet ávvudeapmái.

Golggotmánu 1. beaivvi rahppui šaldi johtolahkii ja go Geir Ove Bakken Finnmárkku fylkkasuohkana váldolávdegottis čuohpasta bátti, de lea šaldi almmolaččat maid rahppon.

Ođđa šaldi lea 12 mehtera rávnnji bealde boares šalddi ja lea 58 mehtera guhku. Šaldi lea ráhkaduvvon stállis ja betoŋŋas. 72 tonna stálli ja 63 tonna ruovdi leat adnon hukset šalddi.

Boares ja ođđa šaldi

Juovlajoga šaldi čatná oktii Juovlavuona giláža ja lea maid Elkema kvartsihttaruvkke luottas. Nu lea šaldi maid dehálaš ealáhusjohtolahkii. 

Boares šaldi huksejuvvui 1961:s ja das leat dál nu stuora vahágat ahte ii sáhte šat divvut daid. Boares šaldi lea maid dušše 4,5 mehtera govddu ja lea danne beare gárži stuora guorbmebiillaide. Ođđa šaldi lea 7,5 mehtera govddu. 

Ávvudeamit álget mánnodaga diibmu 11.30 šalddi alde, ja doppe leat sihke sártnit ja lávlagat.  

-Almmuhus-