-Almmuhus-
-Almmuhus-
OĐĐASAT Juolludit miljovnnaid ealá­husaide

Juolludit miljovnnaid ealá­husaide

-

-

Sámedikki bušeahtas lea várrejuvvon 6 miljovnna ruvnno mánggabealat ealáhusaide. 3,6 miljovnna ruvnno dás lea ohcanvuđot doarjja earret eará prošeavttaide mat váikkuhit fitnodatovdáneapmái. 

Sámediggeráđđi lea juolludan 148 000 ruvnno Bård Andreassenii Nordre Hestnes Gårdii Báhccavuonas. Doarjja addo stuoridit gievkkana ja guossohanlanja mas leat boradansajit. Fitnodat lea árbevirolaš oapmedállu lotnolasat mátkeealahušain.

Dán čállet sii preassadieđáhusas. 

– Mátkeealáhusvuđot fálaldagat vuođđoealáhusain leat bivnnuhat ja dehálaš fálaldagat báikkálaš olbmuide, ja mii jáhkkit ahte erenoamážit mánáide ja vuorrasit olbmuide leat dakkár fálaldagat suohttasat, lohká sámediggeráđđi Silje Karine Muotka (NSR) preassadieđáhusas. 

Sihkkarastinrusttegiid johtolahkii

Sámediggeráđđi lea maiddái juolludan ruđaid Nord-Norsk Trafikksystem AS:i ja Luggeføre Bar AS:i, mat goappašagat leat Ráissa suohkanis. Nord-Norsk Trafikksystem AS áigu oastit dieđihan- ja sihkkarastinrusttegiid johtolatčađaheami váste.

– Fitnodat lea positiivvalaš ealáhusovdáneapmi daid johtalusprošeavttaid ulbmiliid mielde mat leat Davvi-Norggas. Dat lea juolludeapmi mas lea stuora mearkkašupmi, ja lea miellagiddevaš prošeakta mii sáhttá šaddat dehálažžan ollugiidda boahtteáiggis. Mii dárbbahat buohkat buori dieđihanvuogádaga, mii vuhtii váldá sihkarvuođa ja johtolaga jođu boahtteáiggis, dadjá Muotka. 

Olgobáikki ođastit Ráissas

Luggeføre Bar AS lea ođđa fitnodat mii lea guovddážis Hánssagiettis Ráissa suohkanis. Fitnodat lea váldán badjelasas dan báikkálaš pubba Minibar1, mii lea leamaš doaimmas oktanuppelot jagi. Fitnodat áigu ođastit ja viidásiidovdánahttit olgobáikki. 

Sámediggeráđđi lea movttet go doarjagiid bokte sáhttá doarjut Ráissa suohkana ealáhusaid.

– Álggaheaddjit leat hábmen buori vuođu fitnodaga ásaheapmái. Ođasteapmi ja ovdánahttin lea bures plánejuvvon ja de šaddet ođđa bargosajit suohkanii, lohká Muotka. 

Doarjagat juolluduvvojit doarjjaortnegis Juohkelágan ealáhusat ja leat vuoruhemiid vuođul. Dán jagi vuoruhuvvojit doaimmat mat mearkkašahtti láhkái váikkuhit hutkáivuhtii ja fitnodatovddideapmái, ja doaimmat nannejit ealáhusaid main lea stuora potensiála ja alla barggahus dagahan dihte olmmošlogu lassáneami, čuožžu preassadieđáhusas. 

- Advertisement -
-Almmuhus-