Guhtta sámi prošeavtta ožžot Romssa ja Finnmárkku fylkkasuohkanis ruhtadoarjaga.
Romssa ja Finnmárkku fylkkaráđđi Ronald Wærnes, geas lea ovddasvástádus ekonomiijas ja kultuvrras, dieđiha ahte juolludit 210 000 ruvnnu sámi ulbmiliidda.
– Lean ilus go sáhttit doarjut buriid prošeavttaid mat ovddidit sámi giela, kultuvrra ja servodateallima Finnmárkkus, lohká son.
Fylkkaráđđi geažuha ahte sii galget njunnošis nannemin sámevuođa. Dán jagi lea Romssa ja Finnmárkku fylkkasuohkan várren oktiibuot 482 600 ruvnnu sámi doaimmaide.
– Sávvamis oažžut vel eanet buriid ohcamušaid, lohká fylkkaráđđi Ronald Wærnes preassadieđáhusas.
Dássážii lea fylkkasuohkan juolludan 210 000 ruvnnu sámi doaimmaide. Juohke ulbmilii lea vejolaš ohcat 50 000 ruvnnu.
Romssa ja Finnmárkku fylkkasuohkana ruhtajuolludeamit:
̂Deatnogátte Sámiid Searvi oažžu 50 000 ruvnnu lágidit ČSV 50 jagi ávvudeami girjjálašvuođaseminárain.
Mátta-Várjjat gielda oažžu 10 000 ruvnnu 2022 Sámi álbmotbeaivvidoaluide gos ulbmilin lei nannet mánáid ja nuoraid identitehtadovddu ja rámisvuođa.
Hilde Skancke Pedersen oažžu 30 000 ruvnnu dáiddačájáhussii «Vuoiŋŋastat» mii galgá čájehuvvot Guovdageainnus.
DittDesign oažžu 20 000 ruvnnu ráhkadit applikašuvnna mii galgá mánáide oahpahit sámi bustávaid ja sániid.
Sámi musihkkafestivála vuođđudus Guovdageainnus oažžu 50 000 ruvnnu lágidit 2022 Beassášfestivála mánáid- ja nuoraiddoaluid.
Husflidlaget oažžu 50 000 ruvnnu «Illut ja govddodit» workshopii Kárášjogas. Dán bargobájis oahpahit nuoraide ja nuorra ollesolbmuide kajakk- ja fanasduodjeárbevieruid.
