-Almmuhus-
SMÁVVAOĐĐASATJuolludan ruhtalána 360/VR-filmma buvttadeapmái

Juolludan ruhtalána 360/VR-filmma buvttadeapmái

-

-

Sámediggeráđđi lea juolludan 200 000 ruvnno Sahkkon AS:i buvttadit Eallu girdnu – Reindeer Corral nammasaš 360/VR-filmma. 

Prošeakta lea oassi ÁRRAN 360°, mii fas lea oassin 2022 Veneziabiennálas. Lea sámi dáiddár ja artista Elle Márjá Eira guhte buvttada filmma. Prošeakta lea guovtti oasis.

Ođđa vuohki sámi dáidagis ja filmmas

Vuosttaš oasis čuovvut giđđajohtima ja nuorra boazovázzi guhte áiggi mielde galgá váldit badjelasas bearraša ealu. Mii čuovvut giđđajohtima VR bokte, mii lea oanádus Virtual Reality ja mearkkaša virtuála duohtavuohta. Virtuála duohtavuođa ulbmil lea hábmet illušuvnna das ahte leat dihto máilmmis mii lea juogo programmerejuvvon dihtoris dahje man vuođul govva/video lea 360°.

Prošeavtta nuppi oasis ráhkaduvvo 360° oanehisfilbma mas lea dáiddalaš hápmi, muhto mii čatnasa dokumentáralaš VR-filbmii.

– Dát formáhta, mas 360° ja VR-filbmen geavahuvvo, lea ođas sámi dáidagis ja filmmas, ja fállá áibbas ođđa vuogi čájehit sámi filbmadahkkiid ja sámi filmmaid. Mii leat ilus go beassat doarjut iežamet filbmadahkkiid nu ahte besset čađahit diekkár buvttademiid, dadjá sámediggeráđđi Maja Kristine Jåma (NSR) preassadieđáhusas.

Dehálaš ahte sápmelaččat muitalit sámi historjjá

ÁRRAN 360°  lea Internašunála Sámi Filbmainstituhta (ISFI) buvtta Veneziabiennálas sámi paviljongii. Prošeavtta oktavuođas ovttasbargá ISFI ovttas Office of Contemporary Artain (OCA) ja Norsk Filminstituttain. ÁRRAN 360° filmmat čájehuvvojit erenoamáš lávus mii lea 10 mehtera alu ja mas lea 360-gráda šearbma. Eira lea okta dan guđa filbmabuvttadeaddjis gii lea mielde dán prošeavttas.

– Lea illudahtti go eanet sámi filbmadahkkit oainnusmahttojuvvojit Veneziabiennálas jagi 2022 áigge. Dasa lassin lea dehálaš ahte mii ieža beassat muitalit historjámet, ja mearridit mii min kultuvrras ja servvodagas ovdanbuktojuvvo, ja maiddái mo mii ovdanbuktit. Illudan oaidnit gárvvistuvvon buktaga, dadjá Jåma.

200 000 ruvdnosaš doarjja lea juolluduvvon sámedikki kulturdoaimmaid doarjjaortnegis.

-Almmuhus-