Sámediggeráđđi lea guovvamánu rájes miessemánu rádjai dán jagi juolludan 7,4 miljovnna ruvnno doarjjan 23 sámi mánáidgárddiide ja ovcci sámi ossodahkii mat leat dáčča mánáidgárddiin.
Sámediggi lea addán doarjaga sámi mánáidgárddiide ja dáčča mánáidgárddiid sámi ossodagaide maid doaibma lea vuođđuduvvon sámi kultuvrii ja gillii. Dán doarjjaortnega mihttun leat doaimmat mat ovdánahttet ja mat leat vuođđuduvvon sámi árvvuide, gillii, kultuvrii ja árbevirolaš máhttui.
– NAČ 2016:18 Váibmogiella raporttas daddjojuvvo ahte sámi mánáidgárddit leat deháleamos ovttaskas doaibmabijut sámegiela sihkkarastimis, suodjaleamis ja ealáskahttimis. Mánáidgárddis biddjo vuođđu giela oahppamii, ja mánát leat boahtteáiggi giellageavaheaddjit. Danne lea hui dehálaš ahte dat mánáidgárddit leat mielde nanneme mánáid sámi giela, kultuvrra, árbevieruid ja identitehta, dadjá sámediggeráđđi Mikkel Eskil Mikkelsen (NSR).
Sámi mánáidgárdefálaldagat lassánan
Oktiibuot 702 sámi máná ožžot fálaldaga mii lea huksejuvvon sámi giela, kultuvrra ja árbevirolaš máhtu vuođul. 634 máná ožžot davvisámi mánáidgárdefálaldaga, 31 máná ožžot julevsámi mánáidgárdefálaldaga ja 37 máná ožžot lullisámi mánáidgárdefálaldaga.
– Midjiide lea dehálaš ahte mánát leat guovddážis, ja bargat dan ovdii ahte sis lea buoremus vejolaš fálaldat. Mis lea ain bargu mii galgá dahkkot ovdal go oažžut buori, govda sámi mánáidgárdefálaldaga olles riikkas, dadjá Mikkelsen.
