Mánáidgárdi oažžu ruhtadoarjaga háhkat lullisámegielat mánáidgárddebargiid.
Sámediggi čállá preassadieđáhusas ahte Sámediggeráđđi lea juolludan 200.000 ruvdnosaš doarjaga Røros mánáidgárddi, Ysterhagan barnehage/Luvlege managïerte, lullisámi ossodahkii Svaalen goevtese vuoi galget beassat rekruteret lullisámegielat mánaidgárddebargiid.
Leamaš hástalusat
Viidáset dieđihuvvo preassadieđáhusas ahte sámi ossodat Svaalen goevtese Røros mánáidgárddis Ysterhagan barnehage/Luvlege managïerte rahppui 2016:s. Mánáidgárddis leat leamaš hástalusat go sámegiel fálaldat lea organiserejuvvon ossodahkan dáčča mánáidgárddis. Sis váilot oahppan sámegielat fágaolbmot mánáidgárddis, seammás go lullisámegiella lea hui hearkes dilis mánáidgárdde árgabeaivvis, gos dárogiella lea váldogiella.
Prošeakta álggahuvvon
Danne leat álggahan prošeavtta mas áigot rektruteret Lullisámegielat mánáidgárddebargiid, dat boahtá ovdán preassadieđáhusas. Ulbmil lea rekruteret lullisámegielat fágaolbmuid, ávžžuhit ja movttiidahttit olbmuid váldit mánáidgárddeoahpu ja lohkat lullisámegiela.
Sámediggeráđđi juolluda 200.000 ruvnno prošektii doarjjaortnegis Doarjja prošeavttaide ja ovddidanbargguide mánáidgárddiin.
– Prošeakta lea hui buorre vuohki oažžut eanet lullisámegielagiid mánáidgárdái, doppe han biddjo vuođđu oahppat giela, dadjá sámediggeráđđi Mikkel Eskil Mikkelsen.
Nannet bargiid giela
Prošeavtta bokte galget maid bargit mánáidgárddis oažžut fálaldaga nannet iežaset lullisámegiela giellaoahppama bokte.
– Dát lea hui buorre sihke mánáide, váhnemiidda ja mánáidgárddebargiide, muhto maiddái lullisámi servodahkii. Nanu giella- ja kulturgelbbolašvuohta lokte sámi mánáidgárddefálaldaga dási, ja unnida tendeansa ahte dárogiella šaddá ráđđejeaddji giellan, dadjá Mikkelsen loahpas preassadieđáhusas.
