Sámediggeráđđi juolluda 287 000,- doarjaga Gamvik Seafood AS:i.
Fitnodat vuostáiváldá ja reide vilges guliid Gáŋgaviikkas, ja viiddida dál káijabáikki vai lea buoret kapasitehta vuostáiváldimii, čállá Sámediggi preassadieđáhusas.
Guhká áŋgiruššan
Viiddideapmi galggašii buoridit bevttolašvuođa ja dahkat ahte nagodit vuostáiváldit máŋga guolásteaddji seamma áiggis.
– Mii leat máŋggaid jagiid áŋgiruššan ovddidit guolástusealáhusa sámi guovlluin. Prošeavttat mat váikkuhit buoret árvoháhkamii ja mariidna varasávdnasiid viidáset nállašuhttimii, ja erenoamážit dat mat barget bisuhit ja nannet guollevuostáiváldima, leat min vuoruhusain vuođđoealáhusaid doarjjaortnegis, dadjá sámediggeráđđi Silje Karine Muotka.
Háliidit eambbo ohcamušaid
Gamvik Seafood AS lea sajáiduvvan dehálaš fitnodahkan Gáŋgaviikkas, ja lea dehálaš sihke iežas buvttadeami dáfus ja maiddái báikkálaš guolásteddjiid vuostáiváldinapparáhttan.
Káijabáikki viiddideapmi Gáŋgaviikkas dahká vuođu viidásit áŋgiruššamii guliid vuostáiváldimis ja reidemis. – Mii sávvat eanemus vejolaš aktiiva guollevuostáiváldimiid ja guollebuvttadanrusttegiid riddoguovlluin ja háliidivččiimet oažžut eambbo ohcamušaid eará aktevrrain maid geat háliidit ovddidit sin vuostáiváldima boahtteáiggis, loahpaha Muotka preassadieđáhusas.
