-Almmuhus-
-Almmuhus-
-Almmuhus-
OĐĐASATJuollu­da badjelaš mil­jovnna doarjaga boazo­dollui heahte­dilis

Juollu­da badjelaš mil­jovnna doarjaga boazo­dollui heahte­dilis

-

-

Sámediggeráđđi juolluda 1.275 000 ruvnno giđđajohtindoarjaga boazodoalloealáhussii.

—  Guohtunroasu geažil leat bohccot heajubut go dábálaččat ja olu bohccot eai gierdda johtit dálveorohagas geasseorohahkii. Sámediggeráđđi juolluda danne badjelaš 1,2 miljon ruvdnosaš doarjaga fievrrádusortnegiidda mat geahpedit bohccuid ja ealáhusa noađi, dadjá sámediggeráđđi Silje Karine Muotka preassadieđáhusastis. 

Hástalusat giđđajohtimiin 

Sámediggeráđđi oaivvilda ahte šiehtadallanbealit ja hálddašeapmi dahke riekta go ekonomalaččat nannosit dorjo fuođđariid doalvuma.  Dál leat ain hástalusat giđđajohtimiin ja boazodoallit bággejuvvojit fievrridit ealuideaset guorbmebiillaiguin eastadan dihte jápmima ja várjalan dihte bohccuid vuoimmi, dál ovdal guottetáiggi. 

— Danne juolluda sámediggeráđđi dál ohcama vuođul doarjaga oktasaš doaibmabidjui veahkkin fievrridit bohccuid doppe gos lea dárbu, dadjá Silje Karine Muotka. 

Meastta miljovnna Finnmárkui

Sámediggeráđđi juolluda Norgga Boazosápmelaččaid Riikkasearvái (NBR) 1 275 000 ruvdnosaš heahteveahki boazodoalloealáhusa várás, mas 975.000 ruvnno manná Finnmárkui, ja 300.000 ruvnno manná ortnegiidda muđui riikkas.  Ortnega hálddaša Finnmárkku fylkkamánni. Doarjaga várás boazodollui olggobealde Finnmárkku áigu Sámediggi ovttasráđiid NBR:in ja fylkkamánniiguin gávnnahit čovdosa, čállá Sámediggi.  

Boazoealáhus erenomáš váttis dillis

Olu muohttaga ja lássejuvvon guohtuma dihte lea ealát vearáskan olu báikkiin Davvi-Norggas.  Boazodoallit leat guhkit áiggi ferten biebmat bohccuid vai bohccot eai dárbbat gillát ja jáme nealgái.

—  Dakkár earenoamáš váttis dilis lea hui dehálaš ahte giđđajohtin manná nu njuovžilit go vejolaš bohccuide. Danne oaivvildit boazodoallit ahte ferte fievrridit bohccuid guorbmebiillaiguin geasseorohahkii, loahpaha Muotka, gii deattuha ahte lagas gulahallan eará oasálaččaiguin dán áššis mielddisbuvttii ahte lea vejolaš juolludit dakkár earenomáš doarjaga.

-Almmuhus-