Sámediggeráđđi lea juolludan buvttadandoarjaga oktanuppelohkái sámi girjjálašvuođaprošektii. Prošeavttaid váldoáššit lea almmuhit girjjálašvuođa mánáide ja nuoraide, ja almmuhit iešguđet sámegielaide.
Juolludeami ulbmil lea ovddidit kvalitatiiva girjjálašvuođa mii lea gávdnamis sámegillii.
– Lea dehálaš ahte erenoamážit sámi mánáin ja nuorain leat buorit girjjálašvuođat olámuttos, iešguđet šáŋŋeriin ja iežaset sámegillii, ja dan dihte lean ilus go prošeavttat mat leat ožžon doarjaga, speadjalastit dan, dadjá sámediggeráđđi Henrik Olsen preassadieđáhusas.
Mánáidgirjjit
Trööndelagen fylhkengærjagåetie ja Árran julevsáme guovdásj/Hábmer suohkan áŋgiruššet viidáseappot mánáid- ja nuoraidgirjjiid almmuheami ovdii lulli- ja julevsámegillii.
Dán ohcanvuorus lea maiddái ođđa lágádus, Tjihkkom Almmudahka, ožžon doarjaga almmuhit mánáid-/nuoraidgirjji mii lea jorgaluvvon julevsámegillii. Lágádus gullá Ájluktii, Hábmera suohkanis.
Dát ožžot doarjaga
Unjárgga suohkan 200 000 ruvnno
Trøndelága fylkkasuohkan 365 000 ruvnno
Árran- julevsáme guovdásj 365 000 ruvnno
Tjihkkom Almmudahka 97 000 ruvnno
Vintereik forlag fra Wollmann 30. 000 ruvnno
Bárus SA – Sámi lágádus, Nilla ja Ádegáhttu – Sámi álbmotbeaivi, 171 250 ruvnno
Bárus SA – Sámi lágádus, Nilla ja Ádegáhttu fiervvás, 171 250 ruvnno
Orkana forlag as 257 000 ruvnno
Bárus SA – Sámi lágádus, Mánáid lávllagirji ja CD, 380 500 ruvnno
Vilt Forlag 219 696 ruvnno
Mimi Britt Vindenes 50 000 ruvnno
Guokte girjji ja fágagirji
Guovdageainnu lágádus Bárus lea ožžon doarjaga guovtti davvisámegiel mánáidgirjái ja lávllagirjái, masa maiddái gullá CD mas leat lávllagirjji lávlagat.
Fágaprosašáŋŋeris lea Isak Saba guovddáš, Unjárgga suohkanis, ožžon doarjaga almmuhit fágagirjji «Válddán giellan ruovttoluotta II», mas sámegiela vitaliserema teoriijat ja metodat leat fáddán.
– Illudahttá go oaidnit ahte sámi girjjálašvuođadoaibma lea viiddis ja ahte das leat ollu doaimmat. Dát ohcanvuđot doarjagat leat lassin jahkásaš njuolggodoarjagiidda maid Sámediggi juolluda viđa stuorámus sámi lágádussii, dadjá Olsen ja lasiha ahte Sámediggi ovddasguvlui áigu bidjat fokusa dasa ahte sámi girjjálašvuođa almmuheamit maiddái leat gávdnamis e-girjin/digitála hámis.
Doarjjaortnega Doarjja girjjálašvuođa buvttadeapmái boahtte ohcanáigemearri lea njukčamánu 1. beaivvi 2021.