Piera Balto «Piera juoigá» skearru lea viimmat gárvvis almmuhuvvot cd-hámis. Almmuhandoalut gal šaddet veahá earáláganat, go dohko bohtet eará juoigit juoigat Baltoi.
Piera Balto «Piera juoigá» skearru lea viimmat gárvvis almmuhuvvot cd-hámis. Almmuhandoalut gal šaddet veahá earáláganat, go dohko bohtet eará juoigit juoigat Baltoi.
– Juoigit juiget Pirii, ja muhton dáidá juoiggastit Piera Balto. Viimmat beassat almmuhit «Piera juoigá» CD hámis, čállet ČálliidLágádusas.
ČálliidLágádus bovde erenoamáš juoigandáhpáhussii Sámi girjjálašvuođa guovddážii Kárášjogas bearjadaga čakčamánu 18. b. dii. 19.00.
Kárášjoga juoigit ávvudit beakkán juoigi gii ieš lea ollu juigiid juoiggahan NRK Sápmi juoigankonsearttain. Dál čoahkkanit sii juoigat ja juoiggahit Piera Balto. Dáidá ieš Piera ge juoiggastit soames luođi. Lágideaddji ČálliidLágádus guossoha borramuša ja juhkosa.
Loga maid: Almmuheapmi maŋiduvvon čakčii
«Piera juoigá» LP skearru
«Piera juoigá» LP-skearru almmuhuvvui 1978:s. Juoigi ja luođit šadde jođánit bivnnuhin.
Olbmot besse návddašit luđiid, nugo Normo-Jovnna, Lárina (Orbina), Biret-Elle, Dagfinn Balto, ja ollu eará luđiid. CD galggai almmuhuvvot BeskánLuossaRock suoidnemánu álggus, muhto dalle šadde maŋidit almmuheami go deaddilanfabrihka lei meaddán:
Ohcalan CD
Olbmot leat guhkit áigge jearahan juoigis goas dáid čáppa luđiid bersset guldalit CD:as. Maiddái Piera ieš lea smiehttan dan seammá. Dál de viimmat ilbmet luođit CD hámis.
– «Piera juoigá» CD:as gulat juoigi fulkkiid ja oahppásiid luiid, luđiid mat leat dovddus, erenoamážit Kárášjogas. Mii leat ođasmahttán ja «lokten» ovddeš jietnagova, ja nu maiddái bidjan muhtin čuojanasaid, instrumeanttaid ođđasit, čállá lágádus preassadieđáhusastis.
Juoigandáhpáhusas 18.09. lea maiddái vejolaš oastit ođđa CD:a, maid Piera Balto signere.
