Jon Henrik Fjällgren lea BeskánLuossaRocka váldoartista dán geasi.
Jon Henrik Fjällgren lea BeskánLuossaRocka váldoartista dán geasi.
BeskánLuossaRock lágiduvvo dán jagi suoidnemánu 1. beaivvi, nu go dábálaččat Beskenjárggas Kárášjogas.
Beskenjárgilisearvvi jođiheaddji, Stig Arne Somby, muitala ahte sii leat hui rámis stuorra artistta oažžut Beskánlávdái.
Sii fállet musihka ja maiddái gilvvuid sihke mánáide ja rávisolbmuide, čállet preassadieđáhusas.
Dovddus juoigi váldoartistan
BeskánLuossaRock čevllohallá go dán jagáš váldoartistan leat ožžon Jon Henrik Fjällgrena, gii lea máttasápmelaš juoigi ja badjeolmmoš.
Son šattai dovddusin go vuittii Ruoŧa taleantagilvvu «Talang» 2014:s. Son lea maiddái oasálastán Ruoŧa Melodifestiválas guovtte geardde, maŋimuš dán jagi.
Fjällgren almmuhii iežas vuosttaš skearru 2015:s, ja nuppi skearru njukčamánus dán jagi. Jon Henrik Fjällgren lea leamaš jávkosis maŋŋel 2015 Melodifestivalena, gitta dán jagi rádjái.
Beskángenerála Biret-Elle Arne Ettá Stige, Stig Arne Somby, illuda fas sávvat bures boahtima Beskenjárgii geassedoaluide.
– Mii leat hui rámis go leat nagodan dákkár stuorra artistta oažžut. Mii illudat konsertii!
Loahpahuvvo garra rockain
BeskánLuossaRock 2017 loahpaha Kárášjoga beakkán garrarock ja «heavyjoik» joavku Intrigue. Sii leat dovddus miehtá riikka, ja vel olggobeale riikarájáid.
Sii leat rocken Besekánlávddis 2014:s, dalle go festivála álggahuvvui.
– «Gánddat» illudit fas čuojahit ruovttubáikkis ja min mielas lea dát fiinna unna festiválaš, lohká gitarista Tore Skoglund.
Juoigit Beskánlávddis
BeskánLuossaRock:as lea árbevierru bovdet Sámi Grand Prix vuitiid lávdái ja Beskánlavdái lávke ge dán jagi juoiganoasi vuoiti, mázelaš John André Eira, gii diibmá maid rohttestii luođi dán lávddis.
Beskánlávdái lávke maid nubbi juoigi, kárášjohkalaš John Mathis Utsi. Son lea maid oasálastán ja vuoitán Sámi Grand Prix juoiganoasi.
Son faskii vuoittuid 2004:s ja 2010:s.
– Son lea maid Beskániid lávddis finadan ovdal. Dán geasi ilbmá su vuosttas luohteskearru. Son lea čilgen mediaid bokte iežas liikot dajahallat luđiin, dakkár dajahallan mii buktá guldaleaddjái jurdagiid maid sáhttet dulkot, muitala Beskángenerála.
Álbmotrockjoavku
Suomabeale Sámis boahtá Ravggon joavku, mii lea hui gelddolaš álbmotrockjoavku Vuohčus eret.
Ravggon almmuhii vuosttaš skearru «Ráji ravddas» 2016:s, sii áŋgiruššet birrasa, lagašguovllu ja kultuvrra, dat maid geardduhuvvo Ravggona lávlagiin.
Sámi duo
Norgga beale sámi duo Arvva seaguha luđiid ja lávlagiid mat gullet iešguđetlágan musihkkašlájaide.
Guovdageaidnulaš Sara Marielle Gaup Beaska ja Steinar Raknes leaba ovttas čuojahan 2014 rájes.
Steinar Raknes lea Norgga jazzmusihkkár, gii čuojaha kontrabássa.
Sara Marielle Gaup Beaska lea juoigi, ja su dovdat earret eará Adjágas joavkkus.
Gilvvut buohkaide
Stig Arne Somby muitala ahte sis leat maiddái gilvvut sihke mánáide ja rávisolbmuide.
– Mis leat beaivet doalut johkagáttis mánáidoaggungilvu, luossagilvu ollesolbmuide ja eará suohttasat, nu go Beskenjárgilisearvvi vuorbegeassin maŋŋil luossagilvu. Ávžžuhus olbmuide lea čuovvut BeskánLuossaRock Facebook-siiddu gosa biddjo dađis diehtu ja gos gávdno liŋka gos beassá oastit bileahtaid.
