-Almmuhus-
KULTUVRAJuoigankursa ii geasut mánáid

Juoigankursa ii geasut mánáid

-

-

Vaikke kárášjohkalaččat leat sávvan árbevirolaš kulturdoaluid mánáid várás geassemárkaniin, de eai leat galle oasseváldi juoigankursii dieđihuvvon. Dál árvvoštallet lea go gánnihahti oba lágidit ge kurssa.

Kárášjoga jahkásaš geassemárkanat lágiduvvojit lávvardaga. Mánáide lávejit iešguđetlágan doaimmat, ja ovddit jagiid leamaš kulturdoaibman sirkusskuvla. Váhnemat leat ohcalan sámi árbevirolaš kulturdoaluid mánáide, ja danin fuomášii Kárášjoga ealáhussearvi mánáid bovdet juoigankursii. Dattege leat kárášjohkalaččat čájehan unnán beroštumi fálaldahkii.

– Olbmot leat jearahan sámi inspirerejuvvon doaluid mánáid várás, muhto olbmot eai čájet dattege beroštumi. Sirkusskuvlii lávejit dieđihit, muhto juoigankursii leat nu unnán mánát dieđihuvvon ahte ii soaitte gánnihit lágidit kursa, lohká Kárášjoga ealáhussearvvi ássanmiela prošeaktajođiheaddji ja čálli Ann Kristin Laiti.

 

Lassi golut

Kárášjoga ealáhussearvi lea áŋgiruššan jergollačča Berit Alette Mienna doallat kursa.

– Oaivvildan ahte leat ožžon buori bagadalli, gii ovdal lea doallan kurssaid main leamaš buorit buktagat. Lea suddu go olbmot eai čájet beroštumi dákkár doaluide. Biret Alehttá boahtá ihttin Romssas, ja mis lea šiehtadus. Jus kursa ii šatta, de leat mis dattege golut kursii, čilge Laiti.

 


Kárášjoga ealáhussearvvi ássanmiela prošeaktajođiheaddji ja čálli Ann Kristin Laiti.
Priváhtagovva

 

Dáhtu ássiid oaiviliid

Lágideaddji dáhtošii odne mearridit šaddá go juoigankursa vai ii, ja doaivu olbmuid dieđihit iežaset mánáid kursii.

– Mii soaitit boastto aktivitehta válljen, ja danin lean dál jearran olbmuiguin mo sáhttá sidjiide olahit. Mii dárbbašat ruovttoluottadieđuid vai sáhttit buoridit iežamet, dássážii ii leat vel okta ge vástidan.

 

Muđui stuora beroštupmi

Kárášjoga ealáhussearvi lea juoigankursa márkanfievrridan seamma ládje go eará geassemárkanfálaldagaid. Laiti muitala ahte geassemárkaniidda gal čájehit stuora beroštumi.

– Mii fertet dieđusge árvvoštallat leago márkanfievrrideapmi leamaš doarvái buorre. Soaittán veahá čuggestit álbmoga, muhto jus báikkálaš doalut galget lihkostuvvat, de fertejit olbmot searvat ja čájehit beroštumi, lohká son. Geassemárkanis vuvdet fitnodagat gálvvu, ja mánáid várás doallá Kárášjoga sisbandysearvi streetsisbandy ja Nordlys ges juvlaskeittáidkursa. Mánát besset maiddái oaidnit beatnatshowa.

– Mis leat mánáide fálaldagat, muhto kulturoassi sáhttá báhcit guorusin. Mii eat geargga gal eará láhčit dan sadjái, lohká Laiti.

 

Bovde olles bearraša

Juoigi Berit Alette Mienna galleda ruovttubáikkistis ja geassemárkaniid. Son gal ii loga háliidit šluhttet juoigankursa.

– Mánát leat áito geargan skuvllas, ja danin sáhttá sin váttis oažžut kursii. In dieđe leago kursa sátni mii baldá, soaitá orrot láittasin go galgá juoidá oahppat. Mun sávan aŋkke ahte mánát ja nuorat bohtet, ja bovden maiddái váhnemiid, áhkuid, ádjái dahje ristváhnemiid searvat ovttas mánáiguin. Dalle besset oahppat seamma luđiid ja juoigat fárrolagaid. Jus eai boađe olbmot, de sáhttit áŋke muhtin dollagáttis juoiggadit, luohti gal galgá gullot Kárášjogas dán vahkkoloahpa, lohká Mienna optimisttalaččat.

 


Juoigi Berit Alette Mienna.
Vuorkágovva: Kila Anti

 

Amasmuvvamin

Mienna lea smiehttan ahte luohti soaitá amasmuvvamin su ruovttugielddas go kursii eai čájet beroštumi. Son lohká movttiidahttima hui dehálažžan.

– Luohti ferte geavahuvvot, dat ferte šaddat lunddolaš oassin min árgabeaivvis. Lea váhnemiid duohken movttiidahttit mánáid juoigat ja gazzat juoiganoahpu, lea maid dehálaš ahte skuvllain ja mánáidgárddiin juiget. Mun lean dán jagi bargan luđiin mánáidgárddis Romssas, ja munnje muitaluvvo ahte mánát leat álgán juoigat stoagadettiin ja maiddái ruovttus. Mánát muitalit muitalusaid ja dovdduid luđiin, muhtin váhnen muitalii munnje nieiddaža birra gii luđiin muitala man váivi lea čuoigat go ii biso sabehiid alde. Muhtin gánda ges juoiggai olles máidnasa riebana birra, jus eat lean gaskkalduhttit su livččii kánske ain juoigamin. Mánát geat juiget leat hui čeahpi muitalit iežaset vásáhusaid luđiid ja sii máhttet ieža bidjat nuohta, muitala Berit Alette Mienna.

-Almmuhus-