Dál lea Juoigalasat searvi gávdnan ođđa dáhtona juoigangilvui, muhto de lea čuožžilan ges ođđa hástalus.
Guktii leat Juoigalasat geahččalan gávdnat heivvolaš dáhtona sin ođđa juoigangilvui «Juoiganjietna». Goappaš háviid lea bohkká dorron lágideami, ja nu leat šaddan maŋidit dan. Jus it árvidan, de lea korona njoammudávda bissehan gilvvuid.
Dál sii leat fas ođđa movttain mearridan lágidit juoigangilvvuid, ja heivvolaš dáhton dasa lea lávvordaga guovvamánu 26. beaivvi. Nu go ovdal mearriduvvon, de galget gilvvut lágiduvvot Scandic hoteallas Kárášjogas.
Ohcet oasseváldiid
Juoigalasat searvi dat lágida gilvvuid ja jođiheaddji Nils Johan A. Gaup muitala ahte leat mearridan lágidit gilvvuid guovvamánus. Go leat šaddan moatte háve juo maŋidit gilvvu, de lea sis čuožžilan hástalus.
– Dál mis lea mihttu čađahit gilvvu. Dan rájes go maŋemus galggaimet lágidit, de leat muhtin oasseváldit šaddan geassádit go ođđa dáhton ii heiven sidjiide. Dál mii ávžžuhit eanet olbmuid dieđihit gilvui, vai mis gártet 15 oasseváldi mii leamaš mihttu álgoálggus, lohká Gaup
– Dákko bokte mun de ávžžuhan olbmuid dieđihit gilvui. Váldet oktavuođa minguin Juoigalasat searvvis ja mii de ordnet buot eará, lohká Gaup.
Servodat rahpasa
Gaup lea sihkar ahte dál sis gal lea vejolaš lágidit dán gilvvu ja eai galgga dárbbašit maŋidit šat.
Manin leat nu sihkar ahte dál nagodehpet lágidit dán gilvvu?
– Mii leat čuvvon mielde movt eiseválddit dál láhttejit dan pandemiija ektui. Dál orru leamen nu ahte áigot vel eanet rahpat servodaga. Sávvamis mii dál beassat lágidit gilvvuid, ja ahte rahppošii fas vejolašvuohta deaivvadit ja juoigat, lohká son.
Juoigangilvu
Juoigalasat lágidit ge juoigangilvvu gos juoigi oažžu juoigat gean háliida, ii ge dárbbat leat ođđa luohti maid lea bidjan. Gaup deattuha ge ahte dat ii leat luohte gilvu, muhto juoiganjietna-gilvu, nu go gilvvu namma juo muitala.
Duopmárat veardidit juoigi jiena vuođul, man buorre juoiganjietna lea. Dasa lassin veardidit manná go luohti njuovžilit, ja nu ain.
Duopmárat eai dieđe gii juoigá, ja eai galgga luođi vuođul árvvoštallat. Easka maŋŋel go buohkaide leat addán čuoggáid, de besset deaivvadit juigiiguin.
