Máilmmeviidosaš iskkadeapmi čájeha ahte Norgga bargoohccit leat geat beroštit unnimusat iskat bálkká ja penšuvdnaburiid bargosajis.
Máilmmeviidosaš iskkadeapmi čájeha ahte Norgga bargoohccit leat geat beroštit unnimusat iskat bálkká ja penšuvdnaburiid bargosajis.
– Norggas leat eanaš buorit bargodilálašvuođat, ja lea stuora dorvu systemii. Dat dagaha ahte norgalaččat eai beroš liikká olu bargoeavttuin ja bálkkás. Heivehanvejolašvuohta ja ovdánanvejolašvuohta boahtá ovdalii go bálká go galgá barggu válljet, lohká Rut Elise Samuelsen preassadieđáhusas. Son lea ManpowerGroup konsearnahoavda.
– Šaddá unnit bálkádeaddu
Dušše bealli Norgga dienasbargiin dihte bálkáeavttuid ovdal go vuostá válde barggu. USA:s, Duiskkas, Kiinnás ja Japánas lea bálká deháleamos fáktor go válljejit barggu. Norggas deattuhit makkár bargu lea, gos bargu lea, ja leat go heivehanvejolašvuođat. Easka njealjádin boahtá bálká.
– Go nu unnán dihtet bálkká ja penšuvdnaortnegiid birra ovdal go dohkkehit bargofálaldaga, dagaha ahte šaddá unnit bálkádeaddu. De vuoittáhallet bargoohccit, lohká Samuelsen.
Norgalažžii dehálaš heivehit
Mánnáolbmuide lea dehálaš beassat heivehit bargoáiggi, ja beassat leat ruovttus mánáiguin. Okta njealjádasoassi sis geat leat badjel 35 jagi boarrásat háliidit beassat leahkit ruovttus osiid dahje olles bargobeaivvi.
– Norgga bargoeallimis leat olbmot juohke agiin ja osiin eallimis. Danne fertejit bargoaddit sáhttit heivehit, muđui manahit olu buori gelbbolašvuođa, lohká Samuelsen.
Maiddái fitnodaga beaggin lea dehálaš go olbmot galget barggu ohcat.
– Norgga bargit háliidit loaktit barggus. Fitnodagat, main lea buorre beaggin, sáhttet leat eambbo luohtehahtti, lohká Samuelsen.
Nuorra bargiide, gaskal 18- ja 34-jahkásaččaide, lea dehálaš ahte fitnodagas lea čielga višuvdna ja ahte čájehit servodatovddasvástádusa.
Máhttu addá fámu bargoohcciide
Bargit miehtá máilmmi ožžot eanet ja eanet dieđuid ja máhtu. Vuosttaš maid ohcet leat dieđut bálkká birra. Dat váldá fámu bargoaddis ja addá dan bargoohccái.
– Ovdal sáhtii bargoaddi ráddjet maid bargoohccit besse diehtit barggu ja bargosaji birra. Sosiála mediaid ja neahta bokte sáhttet dál bargoohccit gávnnahit daid ieža, mii áddá fámu bargái, lohká Samuelsen.
Vaikko dán áigge lea olu diehtu vaikko man birra, de eai leat norgalaččat nu viššalat ráhkkanit bargojearahallamii. Dušše 56 proseantta bargiin fitnet fitnodaga neahttasiiddu geahččame ovdal go mannet jearahallamii.
– Lohku muitala ahte das sáhttet bargoohccit ávkkástallat. Jus guorahalat ovdagihtii, de sáhtát álkit sierranit dain eará ohcciin, lohká Samuelsen.
