-Almmuhus-
-Almmuhus-
OĐĐASATJuohke njealját lihkohisvuođas lei vuoddji gárrenoaivvis

Juohke njealját lihkohisvuođas lei vuoddji gárrenoaivvis

-

-

Gárrenmirkogeavaheapmi lei oassin juohke njealját lihkohisvuođas johtolagas, muitalit Stáda geaidnodoaimmahaga logut 2015s.

Lihkohisvuođalogut main lei gárrenmirkogeavaheapmi oassin lea beare allat ja Norgga biilavuddjiid searvi (MA – gárrenmirkokeahtes johtolat) lohká dat gáibida eanet hehttendoaimmaid.

 

Eret johtolagas

– Ferte oažžut gárrenvuddjiid eret johtolagas vai nagodit unnidit lihkohisvuođaloguid. Ferte buoridit miellaguottuid ja nannet politiijaid iskkademiid johtolagas, ja ovdamearkka dihte bidjat alkolása biillaide vai bissehit daid geat sáhttet gárrenoaivvis vuodjit biillain. Ferte maid olbmuid oažžut eanet dihtomielalažžan movt narkotihka ja dálkkasgeavaheapmi gárihuhttá, muitala MA generálačálli Elisabeth Fjellvang Kristoffersen.


MA generálačálli Elisabeth Fjellvang Kristoffersen

Alkohola, narkotihkka ja dálkkasat

Diibmá ledje 102 lihkohisvuođa main jápme 117 olbmo johtolagas. 22 proseantta dain lihkohisvuođain lei gárrenmirkogeavaheapmi oassin lihkohisvuođas.

Dain 22 lihkohisvuođain lei 11is alkoholapromilla varas. Golmma lihkohisvuođain ledje vuoddjit seaguhan alkohola ja dálkasiid, ja ovcci lihkohisvuođain ledje geavahan dálkasiid dahje narkotihka.

2005 gitta 2015 rádjái ledje 418 lihkohisvuođa mas gárrenmirkogeavaheapmi lei oassin lihkohisvuođas.

 

Máŋga siva

Leat máŋga siva go lihkohisvuođat dáhpáhuvvet, ja lihkohisvuohta sáhttá fáhkka šaddat jápminlihkohisvuohtan.

Gárrenmirku lea, alla leahtu bálddas ja váilevaš čehppodat vuodjit biillain, dat stuorimus sivat lihkohisvuođaide.

– Ii leat nu váttis oaidnit sivaid mat sáhttet dagahit lihkohisvuođaid. Gárrenmirkogeavaheapmi ja hedjonan leahttoárvvoštallan, oaivveheames biilavuodjin ja dohkkemeahttumis biilavuoddji leat stuora sivat, muitala Elisabeth Fjellvang Kristoffersen.

-Almmuhus-