Joatkkaskuvllain leat logi proseantta ohppiin borranváttut, čájeha ođđa dutkan. Nieiddaid searvvis lea lohku vel badjelis, 16 proseantta bártidit borramin.
Juohke goalmmát joatkkaskuvlanieida, gii lea gaskal 16-19-jahkásaš, vásiha hástalusaid borrama, borramuša ja rupmaša ektui, čállá Aftenposten.
– Guorahallan čájeha ahte borranváttut leat šaddan dábálažžan ja dat gal vuorjašuhttá min, lohká Oslo universitehtabuohcceviesu Region sekjon for spiseforstyrrelser (RASP) seniordutki Camilla Lindvall Dahlgren, gii lea jođihan dutkanbarggu.
Stuorát riska buohccát
Guorahallan čájeha maid ahte juohke viđát oahppi lea riskajoavkkus buohcagoahtit borranváttuiguin. Jus muhtin skuvlaluohkás leat 30 oahppi, de gullet guhtta oahppi riskajovkui. Golmmas ges ožžot borranváttuid.
Dahlheim deattuha ahte dál lea čieža geardde stuorát várra oažžut anoreksiija go 20 jagi áigi. Son jáhkká ahte oallugat ožžot borranváttuid sosiála mediaid geažil.
– Buohkain lea mátketelefovdna dán áigge ja dan bokte sáhttet ovttatláhkai buohtastahttit iežaset earáiguin. Dat sáhttá dagahit ahte eambbo nuorat buohcagohtet borranváttuiguin, lohká son.
Guorahallan čađahuvvui gaskal 2020 skábmamánu ja 2021 miessemánu. Badjel 1 500 nuora vástidedje jearranskoviid ja dasa lassin jearahalle 99 olbmo. Bohtosat galget ilbmat dovddus International Journal of Eating Disorders áigečállosis. (©NTB)
