Dán jagáš Ung-raporttas boahtá ovdan ahte ahte badjel bealli Norgga nuorain leat pessimisttat. Nuorat vuorjašuvvet erenoamážit gorgŋon hattiid, birrasa ja dálkkadaga ja máilmmi ráfehisvuođa dihtii. Raportta doaimmahii Opinion.
Dan mielde dušše 11 proseantta nuorain leat optimisttat, seammás go 52 proseantta leat pessimisttat. Earát leat neutrálat. Stuorámus oassi optimisttaid gaskkas leat Oslo nuorra dievddut geain lea alitoahppu.
Optimisma lea njiedjan maŋimuš guovtti-golmma jagis, dieđiha Opinion senioraráđđeaddi Vilde Vågsland Khronoi. Son muitala ahte nuorain leat eanet vuorjašumit dál go ovdal, ii dušše das mii geavvá dáppe ja dál, muhto maiddái mii geavvá 10-15 jagi geahčen.
– Dat lea eahpedábálaš. Dávjá lea dat mii dáhpáhuvvá dálá áiggis mii vuorjá sin. Dál ballet das mii dáhpáhuvvá boahtteáiggis, dadjá Vårsland.
63 proseantta leat fuolas das go hattit gorgŋot, 52 proseantta vuorjašuvvet dálkkádaga ja birrasa dihte, ja 51 proseantta vuorjašuvvet soađi ja máilmmi ráfehisvuođa dihtii. Dat lea sullii seamma dásis go diibmá. Seammás 47 proseantta vuorjašuvvet behtolaš ođđasiin.
Nuoraidiskkadeapmi čađahuvvo jahkásaččat guorahallan dihtii Norgga nuoraid geat leat gaskal 15- ja 25-jahkásaččat. Dán jagáš iskkadeapmái serve 1000 nuora. Dasa lassin 90 nuora serve vuđolaš jearahallamiidda, nu gohčoduvvon kvalitatiiva jearahallamiidda.
(©NTB)
