Gaskamearálaččat jápmet jahkkásaččat gávcci olbmo huksen- ja rusttetfitnodagaid bargguid oktavuođas. Dutkamat čájehit ahte eatnašat gahččet barggus, ja duššet dainna.
Dutkan čájeha ahte leat gaskal 55- ja 67-jahkásaš dievddut geat duššet barggus eanemusat, go leat huksenbargguin. Nu boahtá ovdan preassadieđáhusas.
Bargobearráigeahčču ja Stáhta Bargobirasinstituhtta (STAMI) leat čállán raportta «Ulykker i bygg og anlegg – rapport 2022», mii lea dehálaš doaibmabidju eastadit lihkohisvuođaid boahtteáiggis.
Raporttas boahtá ovdan mii lea hástalussan ja mo sáhttá bargodábiid rievdadit, vai eastada lihkohisvuođaid.
2021 registrerejuvvojedje ovcci jápminlihkohisvuođa huksen- ja rusttetfitnodagain, ja 2 978 bargolihkohisvuođa.
Boarrásepmosat eambbo suojeheamit
Gahččanlihkohisvuođaid guorahallan čájeha ahte vuorraset dievddut leat eambbo suojeheamit barggus, ja gártet eanemusat gahččanlihkohisvuođaide. Nuorat geardi ges dávjjit gártet eará lihkohisvuođaide dahje bárttiide.
Guorahallan čájeha ahte eanemusat gahčče robis, láhttis dahje eará huksenosiin viesus, nubbin eanemusat ges gahčče ráidalasas.
– Dan maid mii oaidnit, lea ahte bargobáiki ii leat doarvái bures sihkkarastojuvvon. Dan dihte gevvet bargit lihkohisvuođaide ja bárttiide, muitala Bargobearráigeahču direktevra Trude Vollheim preassadieđáhusas.
Vollheim oaivvilda ahte čoavddus sáhttá leat ahte pláne bargguid bures, ja fátmmasta bargiid plánenbargguide. Seammás lea dehálaš riskaárvvoštallat barggadettiin.
