– Dát váhnemat dagahit ahte alkohola soaitá bilidit mánáid suohtas geasi, várre Av-og-Til Randi Hagen Eriksrud.
Ođđa iskkus, maid Respons Analyse lea dahkan Av-Og-Til organisašuvnna ovddas, čájeha ahte 16 proseantta dovdet váhnemiid geat juhket badjelmeare olu mánáideaset oainnu. 19 proseantta nissonolbmuin ja rávisolbmuin geat leat gaskkal 35-44 jagi vástidit dan seamma. Generálačálli Randi Hagen Eriksruda mielas leat dát logut beare badjin.
– Dát guoská measta juohke viđat olbmui ahkejoavkkus geat dávjá leat smávvamánnáolbmot ieža. Vuorjašuhttá mu go leat ná badjin logut, ja seammás čájeha iskkus ahte oallugiin lea buorre diđolašvuohta mánáid ja alkohola birra, lohká son.
Váikkuha oallugiid geassái
Riikkadásis bajásšaddá measta okta logi mánás dakkár bearrašis gos okta dahje goappaš váhnemat rahčet alkoholain.
– Beare olu mánáid geasseluopmu billašuvvá go váhnemat juhket. Lea dehálaš muitit ahte ii guoskka dušše daidda geain lea alkoholaváttisvuohta bearrašis. Dávjá ii dárbbaš eambbo okta dahje moadde unohis vásáhusa ovdal mánná vuorjašuvvá ja ballá ahte dát fas boahtá geavvat, várre Eiksrud.
Oaivvildit berrešii muitalit
Iskosis vástida eanetlohku (63 proseanta) ahte berrešii váldit ovdan alkoholageavaheami singuin geaidda guoská. Sis geat vástidedje ahte leat oaidnán váhnemiid juhkame beare olu, vástidit 38 proseantta ahte sii válde bajás dan. 23 proseantta vástidedje ahte sii šadde eahpesihkkarat dasa ahte maid berrešii bargat dákkár dilis. Eiksrud rámida sin geat dahke juoidá máná dihte.
– Jus oainnát máná geas lea váttis, de lea dehálaš ahte dagat juoidá. Mánáide geat bajásšaddet etniin dahje áhčiin geat juhkaba beare olu, sáhttá mearkkašit olu go muhtin rávisolmmoš oaidná dán, lohká son.
