Ruoŧa eiseváldi dieđiha ahte veahkaválddálašvuohta nissoniid vuostá lea stuora servodatváttisvuohta.
Lea «Brottförebyggande rådet» nammasaš eiseváldi Ruoŧa justiisadepartemeantta vuolde mii almmuha daid loguid ahte Ruoŧas goddo juohke goalmmát vahku nissonolmmoš almmáiolbmui geainna sus lea dehe lea leamaš oktavuohta. Ruoŧa «Brottförebyggande rådet» čujuha maid ahte leat olu vearredagut mat eai registrerejuvvo, ahte lea stuora sevdnjeslohku.
Norrbottena leanastivrras lea sierra ovddasvástádus dan gažaldahkii ja háliida čalmmustahttit dán fáttá ja lágida «Vahkku veahkaválddálašvuođa haga». Dan vahku ságastit, logaldallet ja čájehit filmmaid dan fáttá birra eastadan dihte veahkaválddálašvuođa.
– Ulbmil lea ahte mii galgat bissehit dievdoolbmuid veahkaválddálašvuođa nissoniid vuostá. Mii háliidit čalmmustahttit váttisvuođa ja čielggadit ahte dakkár dahkku lea vearredahkki sivva. Mii lágidit maid «Vahkku veahkaválddálašvuođa haga» vai mii čalmmustahttit dan váttisvuođa ja ahte mii bargat eastadit dan, dadjá Sara Avander, ovdánahttinjođiheaddji barggus almmáiolbmuid veahkaválddálašvuohta nissoniid vuostá Norrbottena leanastivrra preassadieđáhusas.
Veahkaválddi eastadanbeaivi
Norgga Sámediggi maid čalmmustahttá ahte gaskavahku lei ON riikkaidgaskasaš veahkaválddi eastadanbeaivi nissonolbmuid vuostá. Sámediggevistái biddjojuvvo runta ivdnásaš čuovga mii lea čuvges ja optimisttalaš ivdni, ja ovddasta máilmmi friijan dahkkon veahkaválddis nissonolbmuid ja nieiddaid vuostá čállet sii neahttasiiddus.
Sámediggepresideanta Aili Keskitalo dadjá cealkámušas:
– Nu guhká go veahkaváldi sámi nissoniid vuostá dáhpáhuvvá, de dat lea ovttaskasolbmo vuoigatvuođaid ja ovdánanvejolašvuođaid rihkkun. Nu guhká go veahkaváldi albmáid ja nissoniid vuostá dáhpáhuvvá, de dat hehtte sámi servodaga ja eallindili ovdáneames. Mii eat sáhte dohkkehit dan, dadjá Keskitalo.
Buot servodatjoavkkuin
Norrbottena leanastivra dieđiha ahte veahkaválddálašvuohta gávdno buot servodatjoavkkuin ja leat norpmat ja árvvoštallamat mat sáhttet váikkuhit dan servodatváttisvuhtii. Muhto lea vejolaš eastadit dan, ja danin lea deaŧalaš čalmmustahttit dan.
Kalixa gielda bargá gažaldagain prošeavtta bakte «Gielda veahkaválddálašvuođa haga».
– Almmáiolbmuid veahkaválddálašvuohta nissoniid vuostá dáhpáhuvvá dábálaččat nissona iežas ruovttus, ja dábálaččat vearredagu čađaha muhtin gii lea su lagasbirrasis. Mii fertet ságastit ja ságastit veahkaválddálašvuođa birra ja mii dahkat dan dán vahku čilge Kalixa gieldda dorvvolašvuođa- ja eastadanbargi Malin Åberg.
Dáppe sáhtát ohcat veahki
Veahkaválddálašvuođa ja veagalváldilinjá 116 006
Girku SOS 22 40 00 40
Mentála dearvvašvuohta 116 123 dehe neahttasiiddus mentalhelse.no
