Ovtta suorggis lea badjel bealli rihkkon njoammuneastadannjuolggadusaid.
Bargobearráigeahčču dieđiha preassadieđáhusas ahte sii leat čađahan eanet go 500 bearráigeahču maŋemus guokte mánu. Juohke goalmmát háve gávdne unnimus ovtta njoammuneastadannjuolggadus rihkkuma. Eanas rihkkumat leat váilevaš kárten ja njoammunvára riskaárvvoštallan.
Leat guossohanbáikkit ja orrunbáikkit gos eanemus rihkkot. Doppe lea 54 proseantta rihkkon unnimus ovtta čuoggás. Rámbuvrrat leat nubbin, gos 45 proseantta lea rihkkon. Huksen- ja rusttetdoaimmain lea lohku 27 proseantta, ja industriijas ges 25 proseantta.
Bargobearráigeahčču vásiha ahte sivvan dasa lea váilevaš ipmárdus dahje go bargoaddit eai dieđe njuolggadusaid birra. Bargobearráigeahčču sávvá ahte dát bearráigeahčut sáhttet leat ávkin njoammuneastadanbarggus, go bearráigeahčus sii sihke dárkkistit ja bagadallet.
