Sotnabeaivvi čuovganeamis galggai diibmu sirdot ovddos. Áigeministtar Torbjørn Røe Isaksen lea mearridan ahte dat čuvges geasseáigi galgá dahkat du movttegeabbon ja doaibmileabbon.
– Oallugat leat sávvan ahte dál fargga nohká diibmosirdin. Nu ii šatta, vuos. Jeđđehussan lea ahte mii oažžut čuvges eahkediid. Dat lea buorre ođas sihke A- ja B-olbmui, dadjá áigeministtar Torbjørn Røe Isaksen.
Nu go EU, de lea Norga guhkit áiggi sirdán diimmu. Eurohpákommišuvdna árvalii čakčat heaitit sirddašeames diimmu ovddos maŋos juohke jahkebeali.
Mannan vahkku mearridii Eurohpáparlameanta ahte 2021 rájes galgá juohke miellahttoriikka ieš mearridit doalahit go dálveáiggi vai geasseáiggi dábalašáigin.
Digaštallet ain
Leat ain digaštallame ráđis (EU ministerráđđi). Go ráđđi vuos dohkkeha evttohusa, de easka lea evttohus mearriduvvon EU:s.
Dat geavvá árvideames geassemánu.
Fertejit mearridit guđe áiggi čuvvot
EU miellahttoriikkat fertejit ovdal cuoŋománu 2020 mearridit guđe áiggi áigot čuovvut.
– Leat olu oaivilat diibmosirdima birra. Dát áŋgiruššá oallugiid. Earenoamážit smávvamánnáváhnemiid, nu go mun ieš. Norga lea árvvoštallame evttohusa, ja ášši sáddejuvvo gulaskuddamii, dadjá ealáhusministtar.
