– Rámisvuođain ja iluin oaččuimet diehtit ahte leat nammaduvvon «dán jagáš musean Norggas 2017», lohká Árran julevsámi guovddáža direktevra Lars Magne Andreassen.
– Rámisvuođain ja iluin oaččuimet diehtit ahte leat nammaduvvon «dán jagáš musean Norggas 2017», lohká Árran julevsámi guovddáža direktevra Lars Magne Andreassen.
Norgga musealihttu leat nammadan Árran Julevsámi guovddáža, Lulli-Trøndelaga Musea ja Davvi-Norgga Dáiddamusea šaddat dán jagáš musean 2017, almmuha Árran neahttasiiddus.
Jury cealká Árrana birra ná:
– Árran – julevsámi guovddáš Divttasvuonas, lea julevsámi kultureallima coahkki váibmu. Ealas kulturbirrasis mas lea sámi mánáidgárdi, giellaguovddáš ja čohkke ollu doaimmaid, de gilvá musea gelbbolašvuođa, rámisvuođa ja áŋgiruššama julevsámi kultuvrii, historjái ja gillii. Árran musea biras lea bures bargan viežžat sámi vásáhusaid oidnosii, nu go muitalus rádjeofelaččaid birra, geat veahkehedje olbmuid beassat Ruŧŧii soađi áigge, ja čájehan ahte sii leat dehálaš oassin min oktasaš historjjás. Musea lea dál viiddideame čájáhuslanjaid gosa sáhttet čáhkkehit ođđa dáidagiid. Álggus rájes lea Árran čájehan persovnnalaš historjjáid musea barggus. Bargit leat nannen luohttevašvuođa julevsámi birrasis, ja veahkehan ovdanbuktit čiegaduvvon ja váttis historjjáid. Ovtta prošeavttas lea ovdanbukton bonju ja homofiila sámiid vásáhusaid, ja eará ges dat lossa rohcošanhistorjjáid čuvgen mat leat čuohcan julevsámi birrasis. Árran lea čájehan ahte luodda rámisvuhtii ja gutnálašvuhtii ii mana vajáldahttima ja čiegadeami bokte, muhto baicca vázzit daid lossa lávkkiid ja heahpatvuođa áššiid loktet máhtuin, rabasvuođain ja gierdevašvuođain, cealká jury.
Lokten dehálaš fáttáid albmosii
Árran lea guhkit áiggi deattuhan musea servvodatrolla, ja lokten fáttáid nu go dáruiduhttin, badjelgeahččan ja nállevealaheapmi. Fáttát maid sámi servvodagat leat vásihan ja vásihit ain.
– Mii ipmirdit ahte min guhkitáiggi bargu čuvget váttis ja heahpatlaš áššiid, lea manne mii leat nammaduvvon dán bálkkašupmái. Nammadeapmi lea stuora fágalaš gudni midjiide, deattuha Árran julevsámi guovddáža direktevra Lars Magne Andreassen.
Čájehan ovddasvástádusa
Váttis fáttáid čalmmustahttimiin, leat sii geat eai oidno eai ge gullo, sii geat rahčet, eai oaččo ánssášeami servvodatberoštumi ovddas, dahje sii geat čiegadit iežas soju ja geat sii leat. Árran lea čájehan ovddasvástádusa rohcošemiid áššiin, homofiliijain ja rádjeofelaččaid bargguid čuvget, čuožžu preassadieđáhusas.
– Lea vuosttažettiin min fágalašvuohta ja min čeahpes bargit geaidda nammadeapmi lea gudnin, lohká museajođiheaddji Harrieth Aira.
Árran julevsámi guovddáš lea bálkkašumi doaluin njukčamánu 30.beaivvi Fredrikstadas.
Bálkkašumi mihttu lea rámidit museabarggu ja movttiidahttit museaid jurddašit ođđa vugiid ja doaimmaid main lea alla kvalitehta.
