Norgalaččat juhke guokte lihttera unnit mielkki 2019:s, ja gaskamearálaččat juhket norgalaččat ovtta glása mielkki juohke beaivvi.
Logut maid Melk.no lea ovdanbuktán čájehit ahte juohke norgalaš jugai 80,2 lihttera Norggas buvttaduvvon mielkki 2019:s, iešguđetge sorttas.
Jagi 2018 juhke norgalaččat 82,1 lihttera mielkki, mii mielddisbuktá 7,4 miljovnna lihttera geahpedeami. Juohke norgalaš juhká 2,2 desilihttera mielkki juohke beaivvi, mii lea masá okta glása mielki juohkehažžii juohke beaivvi.
– Geahpideapmi ii leat nu stuoris diimmá ektui, muhto jus dáhpi joatká, de sáhttá dat čájehit heivemeahttun treandda norgalaččaid borrandábiin. Mii eat sáhte čuovvut mielde treanddain ja molsut dearvvašlaš vieruid vieruiguin mat eai leat nu dearvvašlaččat. Mielki lea leamaš dehálaš oassi min borrandábiin, go das leat dehálaš biebmoávdnasat nu go kalsium, vitamiidna B12, proteiinnat ja judda, dadjá Ida Berg Hauge Melk.no preassadieđáhusas.
