Jotket ohcamis nissona gii lea láhppon Sállanis ja politijat dieđihit ahte sis lea doaivva gávdnat nissona heakkas.
Politiijain lea doaivva gávdnat nissona Sállanis heakkas ja leat biddjon olu návccat gávdnat nissona. Politiijat ožžo dieđu sotnabeaivvi diibmu 00:30 ahte nisu lea láhppon Sállanis. Dalle álggahuvvui viiddis ohcan gávdnat nissona.
Veahkabálvalusat ohcamin
Sotnabeaivvi ohce stuorra veahkkebálvalusat nissona guovllus, eaktodáhtolaččat serve, Rukses Ruossas olbmot, Norgga Álbmotveahkki, Norgga gádjunbeatnagat, Stáhta Luonddubearráigeahčču (SNO), dollačáskadanveahkit, boazopolitiijat, Ruovttusuodjalus, Norgga lottasearvi ja Siviilasuodjalus.
Guokte gádjunfatnasa, Vekteren ja Riddodoaimmahaga fanas Strilborg, ja earet eará Sea King ja eará helikopterat main lea lieggaohcankámera leat oassálastán sotnabeaivvi nissona ohcamii.
Ohcet systemáhtalaččat
Mannan ija leat olbmot leamaš guovllus, sii dađi bahábut eai leat gávdnan nissona dahje eará dieđuid mat sáhttet addit dárkilit dieđuid gos nisu lea.
Iđitdiimmuin vuossárgga leat biddjon ođđa olbmot sadjái ohcat nissona ja veahkkebálvalusat ohcet nissona seamma garra návccaiguin.
Diibmu 07:00 ledje guokte helikoptera ohcamin nissona ja eatnan alde de ohcet veagat systemáhtalaččat, seammás lea eará veagat geat dárkkistit bálgáid.
Ráhpis ja ceakkus
Guovlu gos ohcet nissona lea guovllus gos doivot nissona, gos son maŋimuš oidnui.
Guovllus lea suhkkes skoaddu ja lea eahpesihkar ahte nisu lea johtán dan guvlui gosa leat vuordán. Luondu guovllus gos nisu lea láhppon lea ráhpis ja ceakkus, mii mielddisbuktá ahte leat váttis ohcat.
– Eana gos ohcat nissona lea issoras hástaleaddji, muhto mis lea doaivva gávdnat nissona, dadjá Finnmárkku politiijaid operašuvdnajođiheaddji Gunnar Øvergaard.
Heajos dálki
Lea heajos oainnádat gos leat ohcamin nissona, olu biegga ja arvi leamaš dan maŋimuš jándora, muhto beaivvi mielde galgá firtet.
Meahccemátkkis
Nisu gii lea láhppon lei golbmasiin ovtta fáru beaivemátkkis Nordsandfjordenii. Go vázziledje ruovttoluotta sullii diibmu 19:30 lávvardaga eahkeda, de vulge iešguđet guvlui.
Maŋimuš go nissoniin lei oktavuohta lei go son lei Nordsandfjordvannet bokte ja dan maŋŋá lea sus jáddan telefovdna.
Láhppon nisu lea váile 60-jahkásaš, son lea hárjánan mátkeolmmoš ja lea bures gárvodan. Son lea sullii 1,50 mehtera allat ja lea Koreas eret. Sus leat čáhppes vuovttat ja badjelis leat čáhppes buvssat ja alit jáhkka, ja maiddái alit lávka.
Politiijat dáhttot maid veahki eaktodáhtolaččain ohcat nissona. Váldde politiijain oktavuođa dán telefonnummiris 78972000.
