29-jahkkasaš Dmytro Savchuk ii leat vel gávdnon.
29-jahkkasaš Dmytro Savchuk ii leat vel gávdnon.
Oarje-Finnmárkku politiijat ožžo dieđu lahppon olbmo birra disdaga čuovganeapmái.
– Vihtan guhte lea leamaš jávregáttis, lea fuobmán gopmánan fatnasa. Stevvelat ja dievddu beana mii lei čatnon murrii, maid gávdnoje jávregáttis, lohká Lars Jørgen Kleven Oarje-Finnmárkku politiijaguovllus.
Dievdu gean ohcet lea Ukrainalaš stáhtaborgár.
– Sihke buollinčáskadeaddjit, ambulánsa ja politiijat leat ohcame, seammás go Seaking-helikopter maid lea girdán, muhto dál lea loahpahuvvon, lohka Kleven.
Politiijat leat leamaš báikkis iskkame ášši. Earenomažit gos fanas ja stevvelat leat gávdnon.
– Fertet gávdnat eambbo dieđuid jávrri birra ovdal álgit ohcat eambbo čázii vuolde, muitala Anders Bjørk Olsen Oarje-Finnmárkku politiijaguovllus.
Gaskavahkku ohcagohte čázi vuolde ROV nammasaš gáiddusstivren čázevulošreaidduin, ja navdet dievddu duššan.
– Leat loahpahan gádjunakšuvnna, eat ge oza šat olbmo gii lea heakkas. Dál lea dilli rievdan, ja dál ohcat olbmo maid navdit duššan, dieđiha Oarje-Finnmárkku doaimmahusjođiheaddji Lars Jørgen Kleven.
Ohcanveahka lea ain ohcame, muhto ii leat vel gávdnon.
– Dá lea oalle hástalus. Mii leat ohcan guovtti sajis, jus de ii gávdno, de šaddat árvvoštallat maid de dahkkát, lohka Kleven.
Dán dieđiha iFinnmark.