-Almmuhus-
OĐĐASATJotket loddemiin ja gárdumiin

Jotket loddemiin ja gárdumiin

-

-

Finnmárkkuopmodaga (FeFo) stivra mearri­dii gieskat, ahte giđđalodden Guovda­geain­nus ja Finnmárkku ássiid gárdun jotkojuvvo.  

FeFo čađahii 2017:s árvvo­štallama ja dálvit gulaskud­dama smávva­fuođđobivddu birra go departemeanta gáibidii nannet
smávva­fuođđobivddu bivdo­guovlomodealla.

– Leat ožžon olu buriid evttohusaid/oaiviliid, maid mii oaivvildit mii leat vuhtiiváldán barggusteamet ođđa bivdo­njuolgga­dusaiguin, lohká stivrra­jođiheaddji Máret Guhttor FeFo ruovttusiiddus.

 

– Deaŧalaš kulturguoddit

Sihke giđđalodden ja rievssat­gárdun ledje maiddái gulaskud­damis.

FeFo stivra mearri­dii dáid bivdovugiid joatkit seamma láhkai go dán rádjái lea dahkkon. 

– Árbevirolaš, vásáhusaide vuođđuduvvon máhttu ja árbevirolaš sámi doaimmat nugo giđđalodden Guovdageainnus ja gárdun, leat deaŧalaš kulturguoddit maid FeFo áigu joatkit, dadjá Máret Guhttor, gii lea duhtavaš ahte leat boahtán nu ollu oainnut/evttohusat gulaskuddamis Finn­márkku­opmodaga smávva­fuođđo­bivddu njuolgga­dusaid birra. 

 


…ja finnmárkulaččat besset ain gárdut rievssahiid.
Vuorkágovva.

Nanu vuođđu

Muđui áigu FeFo ođđa njuolgga­dusaiguin nannet báikkálaš geavaheami vuhtiiváldima olles áigodaga ja fylkka ássiid vuoigatvuođaid, ja dahkat smávvafuođđobivddu háldda­šeami dárkilabbon.

Almmolašvuođa vejolašvuohta bivdit sihkkarastojuvvo ain.

Oktiibuot oaččui meahcceossodat 35 oainnu, earret eará Sámedikkis, Finnmárkku fylkkagielddas, vihtta boazo­doalloorohagas, Norgga Boazo­sápmelaččaid Searvvis, NJFF bivdolihtus, golmma gielddas ja mátkkoštanealáhusfitnodagas ja 15 priváhta olbmos.

 

Jearahallaniskkadeami neahtas

Dasa lassin lágiduvvojedje čieža álbmotčoahkkima iešguđet sajiin fylkkas.

Gulaskuddama deaŧa­leamos fáttát ledje gažaldagat mo galgá muddet bivddu, beatnaga geavaheami ja boazodoalu vuhtii­váldima.

– Earret daid árbevirolaš kaná­lain, čađahii FeFo jearahallan­iskkadeami neahtas. Bohte oktiibuot 1.623 vástádusa go áigemearri dievai, muitala meahce­jođiheaddji, Einar J. Asbjørnsen.

FeFo lea maiddái čađahan jearahallaniskkadeami.

Dat sádde­juvvui bivdiide geat ledjen oasttán bivdokoartta áigo­dahkii 2017/18 e-boastan.

Iskkadeapmi lei maiddái fidnemis ruovttu­siidduin ja sosiála mediain.

Ođđa njuolggadusat

Stivra mearridii geassemánu 27. beaivvi ođđa njuolggadusaid mearrádusevttohussii, mii dasto galgá gustot 2018 čavčča rájes.

– Ođđa njuolggadusat dahket eanet vejolažžan go ovdal olahit dárkilis ja máhttovuđot háldda­šeami, ja vuoruhit fylkka bivdiid go lea dárbu, dadjá jođi­headdji Einar J. Asbjørnsen.

 

Oanehaččat muitaluvvon šaddet smávvafuođđobivddu njuolgga­dusat ná:

• Fylkka ássit besset bivdit buot bivdoguovlluin Finnmárkku­opmodagas.

• Muddemat galget geahččalit sihkkarastit ahte olbmot geat orrot Finnmárkkus galget besset bivdit buot bivdoguovlluin miehtá áigodaga, ja earenoamážit sámi kultuvrra, boazodoalu, meahcce­geavaheami, ealáhus­eallima ja servodateallima vuođđun.

• Vuovdigoahtit vissis koartameari olbmuide geat ásset olggobealde Finnmárkku borge­mánu 1. beaivvi rájes, ja lohkamiid bohtosiid vuođul sáhttet biddjot vel eanet koarttat borgemánu loahpas.

• Rahppojuvvo geavahit áigo­dateari áigodatkoartabivdiide.

• Earenoamáš dáhpáhusain sáhttá maiddái muddet fylkka ássiid bivddu muhtun bivdoguovlluin.

• Boazodoalu vuhtiiváldin nannejuvvo sihke diehto­juohkimiin ja konkrehta mudde­miiguin.

• Gárdun ja giđđalodden jotko­juvvo.

 

Oallugat beroštan

Máret Guhttr dadjá ahte oallugat beroštit smávvafuođđobivddus, ja FeFo bealis leat ilus go leat ožžon oaiviliid ja evttohusaid. 

– Dat leat leamaš deaŧalaččat hábmen dihte hálddašeami mii lea sihke dássádallon ja ceavzil, ja buoremussan daid 76.000 vuoigatvuođalaččaide mat mis leat fylkkas, lohká Guhttor.

-Almmuhus-