-Almmuhus-
OĐĐASATJotket gozihit dávdda leavvama

Jotket gozihit dávdda leavvama

-

-

Finnmárkku buohcceviessu lea mannan bearjadaga rájes vuolidan gearggusvuođastáhtusa ruoná gearggusvuhtii.  

Gearggusvuođasáhtus sirdo fiskes ivnnis ruoná ivdnái covid-19 rohttodávdda oktavuođas. Dan lea direktevra mearridan ovttas jođihangottiin bearjadaga cuoŋománu 17.beaivvi.

Dávda ii leavvan nu go balle

Sivvan dasa lea go dearvvašvuođafitnodagas lohket dál oaidnit ollislaš dili ja ahte sis lea buorre bearráigeahčču. Njoammun Finnmárkkus ii leat leavvan nu viidát dán covid-19 pandemiijas, nu go álggos balle.

– Seammás lea dehálaš deattuhit ahte mii leat ain gearggusvuođadilis, ja vuordit ain njoammuma lassánit maŋŋelaš dán jagi mielde. Ruoná gearggusvuođas gozihit ain dili, ja leat gergosat jus njoammun leavvagoahtá Finnmárkkus, lohká hálddašeaddji direktevra Eva Håheim Pedersen preassadieđáhusas.

Doalahit dárkkistemiid ja doaimmaid

Finnmárkku buohcceviessu lea dál dan dilis mas fitnodat ráhkkana álggahit fas dábálaš doaimma maŋŋel go unnidedje doaimmaid njukčamánus. Dat garra njoammunsuddjendoaimmat, mas lea sisaluoitindárkkisteapmi, desinfiseren ja bassan doalahuvvo seamma dásis, vaikko lea eará gearggusvuohta.

– Mii leat plánegoahtán boahtte vahkku rájes lasihit doaimmaid, maŋŋel go leat njukčamánu gaskamuttus unnidan doaimmaid garrasit. Pasieanttat geain maŋidedje divššu, galget ođđa áiggi oažžut. Vuoruheapmi dahkko maid medisiidnafágalaš árvvoštallama vuođul geas lea eanemus hoahppu oažžut divššu.

Finnmárkku buohcciviesu bealis leat pláneme bargiid ja reaidduid ektui ahte njoammubárru boahtá maŋŋelaš dán geasi Finnmárkkus. Kapasitehta lea buorre, ii ge njoammun leat leavvan. Buohcceviesus dieđihit maid ahte leat gergosat gieđahallat olu pasieanttaid, jus dasa šaddá dárbu, ja leat čađat bargame doaimmaiguin.

Okta covid-19 pasieanta

Bearjadaga dieđiha maid Finnmárkku buohcceviessu ahte dál lea dušše okta olmmoš buohcciviesu divššus covid-19 dihte, ja pasieanta lea Girkonjárgga buohcciviesus.

-Almmuhus-