-Almmuhus-
OĐĐASATJotket giella­lokte­miin

Jotket giella­lokte­miin

-

-

Sámegielaid oainnusmahttin lea deaŧalaš áŋgiruššansuorgi Sámediggeráđi bušeahttaevttohusas 2021. Bušeahtaevttohusas leat sii válljen nannet sámi giellaguovddážiid ja NAČ 2016: 18 – Váibmogiela.

Sámi giellalávdegoddi ovddidii 2016:s čielggadusa NAČ 2016: 18 – Váibmogiella, ja Sámedikki dievasčoahkkin mearridii juovlamánus 2018:s ollislaš strategiija sámegielaid várás, Gïelelutnjeme – Giellalåpptim – Giellalokten – Språkløftet. Sámediggeráđđi dieđiha sin preassadieđáhusas ahte lea 2021 bušeahttaevttohusastis válljen áŋgiruššat doaibmabijuiguin mat leat čadnojuvvon dása ollu servodatsurggiin.

– Giela oainnusmahttin lea gullevašvuođa, leahkima ja dohkkeheami symbola. Danne áigu sámediggeráđđi áŋgiruššat dán jagi bušeahtas doaibmabijuiguin mat galget dán doibmii váikkuhit, ja mii joatkit áŋgiruššama Váibmogielain ja giellaloktemiin, dadjá sámediggeráđđi Mikkel Eskil Mikkelsen (NSR) preassadieđáhusas.

Giellaguovddážat

Oktiibuot 16 sámi giellaguovddáža ožžot njuolggodoarjaga Sámedikkis. Jagi 2021 rájes ožžot maiddái guokte ođđa giellaguovddáža fásta doarjaga Sámedikkis. Dát leat Návuona giellaguovddáš Návuona suohkanis ja Sámi viessu Oslos.

– Sámi giellaguovddážiin lea giellafágalaš gelbbolašvuohta ja leat báikkálaš giellaguoddit. Guovddážat leat deaŧalaš ovttasbargoaktevrrat midjiide barggus sámegielaid loktemiin ja oainnusmahttimiin, muitala Mikkelsen. Dasa lassin leat mii nannen buot giellaguovddážiid nu ahte dat sáhttet váikkuhit 2021 Giellavahku čađaheapmái, leat bidjan 800 000 ruvnno dasa, dadjá Mikkelsen.

Sámi giellaguovddážiidda Gielearenie, Gïelem nastedh ja Aajege addojuvvo lassin okta ovtta jagi lasáhus 150 000 ruvnno guhtiige sámi báikenamaid čohkken- ja duođaštanbargui máttasámi guovllus.

Sámi giellaáittardeaddji

ČIELGGADIT: Mikkel Eskil Mikkelsen oaivvilda leat deaŧalažžan čielggadit doaibmabijuid ja láhkabarggu NAČ 2016: 18 – Váibmogiella oktavuođas. Govven: Kenneth Hætta/Sámediggi
ČIELGGADIT: Mikkel Eskil Mikkelsen oaivvilda leat deaŧalažžan čielggadit doaibmabijuid ja láhkabarggu NAČ 2016: 18 – Váibmogiella oktavuođas. Govven: Kenneth Hætta/Sámediggi

Sámediggeráđđi lea maiddái várren 650 000 ruvnno NAČ 2016: 18 – Váibmogiella čuovvuleapmái, čuovvulit čielggadusa doaibmabijuid ja láhkabarggu.

– Midjiide lea deaŧalaš váiddavuoigatvuohta, sámelága giellanjuolggadusaid bearráigeahččan ja sámi giellaáittardeaddji ásaheapmi, dadjá sámediggeráđđi Mikkelsen ja deattuhastá:

– Mii oaidnit ahte lea dárbu čielggadit dáid doaibmabijuid ekonomalaš ja hálddahuslaš váikkuhusaid. Danne leat mii várren ruđaid dáid čielggademiid dahkamii, dadjá Mikkelsen loahpas.

Bušeahttaevttohus galgá meannuduvvot Sámedikki dievasčoahkkimis juovlamánus.

-Almmuhus-