-Almmuhus-
KULTUVRAJorgalan Liverpool lávlaga sámegillii

Jorgalan Liverpool lávlaga sámegillii

-

-

Sámi Musihkkavahkkus čájehuvvo ođđa musihkkavideo vuosttaš geardde. Videos lea «You ‘ll Never Walk Alone» lávlla jorgaluvvon sámegillii.

 

Dát lea dovddus spábbačiekčanlávlla, man Liverpool Football Club čuvodeaddjit dávjá geavahit.

 

«It goasse okto don»

Sámegillii lea lávlaga namma «It goasse okto don».

– Video geahččala čatnat sámi álbmoga rámisvuođa ja gillámušaid ja bargiidceahkkejoavkku Liverpool FC čuvodeddjiid oktii. Dát dihtet maid mearkkaša go okto šaddá vánddardit, čállet Sámi Musihkkavahkku lágideaddjit preassadieđáhusas.

Video lea filbmejuvvon Finnmárkkus ja Liverpoolas.

– Das oaidnit earret eará doaimmalaš mánáid Liverpoolas ja Álttás, guokte beakkán spábbačiekči, beanavuoddji, ovtta Hillsborough-tragediija leaskka, mas 96 olbmo dušše ja guokte sámi nissona geat gudnejahttiba sin geat dušše, čállet lágideaddjit.

Videos oidno maid imašlaš vánddardeaddji guhte lea muhtin boares sámi áhku lusa jođus Finnmárkku duoddaris.

– Dát video čájeha man čáppis searvevuohta lea, gos dal de orožat, ja gosa dal de manažat, de it goassege vánddar okto, čállet sii.

 

Álgočájáhus

Musihkkavideo leat gohčodan «Sami YNWA», ja dat čájehuvvo vuosttaš geardde Álttá kultursálas, duorastaga guovvamánu 2. beaivvi, diibmu 17:00.

– Čájáhusa oktavuođas lea maiddái ságastallan Roger Ingebrigtsen Agenda Nord-Norges, rešisevrra Magne Pettersen, artista Marit Hætta Øverli ja musihkkabuvttadeaddji Klemet Anders Buljo gaskkas, muitala festivála.

Dán dáhpáhusa leat gohčodan «Sápmelaččaiguin ja Davvi-Norggain Anfieldii» ja joavku ságastallá dán prošeavtta jurdaga ja proseassa birra. 

 

Álggahit mánáidprográmmain

Musihkkavahkku álgá gaskavahkku guovvamánu 1. beaivvi, ja bistá lávvardahkii, guovvamánu 4. beaivái.

– Mii leat rámis go beassat viiddis kultur- ja musihkkaprográmma fállat, mas leat oasit ođđaseamos ja buoremus sámi musihkas ja lávdedáidagis, čállet lágideaddjit.

Gaskavahkku álggahit prográmma musihkkalágidemiin mánáide Álttá Kultursálas, «ALO» konsearttain, dán konsearttas čuojaheaba mánnávuođa ustibaččat Marit Hætta Øverli ja Klemet Anders Buljo.

Duorastaga bovde ges Sámi Musihkkavahkku erenoamáš eahkedii Nordlyskatedrálii. Konsearta ávvuda dan go dál lávket čuovgasat áigái, ja lea jahkásaš oassi festiválaprográmmas.

Konsearttas čuojahit ge Birgitte Grimstad, Sara Ajnnak, Hege-Sofie Nilsen og Inger Johanne Oskal.

 

Čalmmustahttet ávvudeami

Ovttasráđiid Álttá City Scenein čalmmustahttá festivála sámi ávvudeami eahketkonsearttaiguin sihke bearjadaga ja lávvardaga.

– Eahketprográmma rahppo Sámi guldaleddjiidjiellahiin ja «Dán jagi sámi radiohit» bálkkašumi vuitiin, Felgen Orkesteriin, bearjadaga, čállet sii.

Lávvardaga ges čalmmustahttá Duolva Duottar 2017 Sámi ávvudeami, konsearttain City Scenes.

– Joavku illuda hirbmasit ja lea diehttelasat hui rámis go besset čalmmustahttit dán jagi feastakonsearttain Álttás, čállet lágideaddjit.

-Almmuhus-