-Almmuhus-
-Almmuhus-
VALÁŠTALLAN Jonna Blind vuittii Supermatch USA:s

Jonna Blind vuittii Supermatch USA:s

-

-

Son lea gievrrat go olu dievdoolbmot, ja dan son čájehii ge gilvvus ameriikkás.

Bovdejuvvon

Jonna Blind muitala Ruoŧa Sáme­rádioi ahte WAL Supermatch Showdown lei gullan su birra ja bovdejedje su boahtit gilvalit.

– In dieđe mo stuoris Valerie Beach lea, muhto USA:s lohket son lea máilmmimeašttir. In dieđe man sajis son lea buore­musaid­listtus. Mun lean vuoitán EM ja MM bronssa, lohká Jonna Blind Sameradio jearahallamis.

Vuoittahallámin

Vuosttaš vuorus lei Jonna Blind vuoittáhallamin 2-0.

Maŋit vuorus vuittii Jonna Blind 3-2 ja dalle movttáskii son.

Muitalii sus ledje guokte movttiideaddji beavdde geažes geat jitnosit veahkeheaigga su.

– Dalle mun mearridin. Mus lea vejolašvuohta vuoitit ja mun in hálit vuoittáhallat. Lea dušše buoremus teknihka geavahit ja bonjastit su beavdái. 2-1 lei olámuttos, muitala Jonna Blind.

 

USA:s stuorit árvu

Jonna Blind muitala USA:s besset geahččit áibbas beavddi láhkai, muhto mearridii ii son áiggu diktit olbmuid ja rieja su muosehuhttit.

– Ja de vuiten su badjel. In ádden vuos. Easkka maŋŋá ádde­jin ja dalle šadden nu ilus. Illá nahkárat bohte. Jus USA:s vuoitá lea mealgat stuorát go Ruoŧas vuoitit, vaikko giehtafággádallan lea stuorát Ruoŧas go USA:s. Gehč­čen fággádallama YouTube neaht­ta­báikkis, lohká Jonna Blind.

 

Muitaledje ahte lea badjeolmmoš

Son muitala Valerie Beach lea guhkit ja gievrrat go son, nu ahte šattai gilvalit su vuosttá losit deaddoluohkás.

Lohká dát lei su mielas hui vuogas vuohki čájehit maid nisson giehtafággádallit nagodit.

Son guhte muitalii giehta­fággá­dallama birra, muitalii ahte Jonna Blind lea badjeolmmoš.

Muhto Blind ii jáhke sii áddejedje olus mii su bargu lea, vaikko jearahedje su dan birra.

Dál go boahtán ruoktot Klimhpe báikái Vualtjere gildii Västerbotten leanas Ruoŧas, de áigu ávvudit riegádanbeaivvi go dan ii astan dahkat ovdal go dollii USA:i.

Das maŋŋá vurdet miessemearkumat.

– Boahtte giehtafággádallan lea Máilmmi Meašttirgilvu Tyrkias čakčat, lohká son vel loahpas.

-Almmuhus-