Oktanuppelogi jagi maŋŋá go son ovddit háve čuoččui Márkomeanu lávddi alde boahtá Jon Henrik Fjällgren ruovttoluotta.
– Mii illudat sakka oažžut Jon Henrik Fjällgrena ruovttuluotta Márkomennui. 2004s galledii son min nuorra taleantan. Dál son boahtá ruovttuluotta, ja lea okta dain stuorámus násttiin Sámis, dadjá Márkomeanu festiválajođiheaddji Marita Kristin Eilertsen.
Beakkán šaddan
Jon Henrik Fjällgren lea maŋimuš jagi leamaš hirbmat bivnnut artistan. 2014s bođii son dego biegga mii bosihii miehtá Ruoŧa go vuittii Talang Sverige tv-prográmma. Su ovdanbuktin “Daniele vuelie” (Daniel luođis) tv- prográmmas lea čájehuvvon badjel 5,5 milliuvnna geardde YouTube:s.
Dán jagi lea son mielde Melodifestivalen:is, Ruoŧa Grand Prix:as, luđiin “Manne leam frijje”. Luohti lea dál nuppi sajis Sverigetopplistan:is. Golmma vahku áigi beasai Fjällgren viidásat Melodifestivalena oassegilvvus Staares.
Ihttá favorihtta
Ihttin gilvvohallá son Friends Arena:s Stockholmas beassat Ruoŧa ovddastit Eurovision Song Contest:as. Fjällgren lea favorihtaid searvvis vuoitit Stockholmas ihttin.
Dán dieđiha Márkomeannu preassadieđáhusas. Márkomeannu lágiduvvo 23.7.-25.7.15.
