OĐĐASAT Jon Erland Balto lea Deanu ođđa sátne­jođiheaddji

Jon Erland Balto lea Deanu ođđa sátne­jođiheaddji

-

-

Vuossargaeahket čielggai guđiin joavkkuin Deanu sámelistu áigu ovttasbarggat boahtte válgaáigodaga. 

Deanu Sámelisttu Odd Erik Solbakk muitala ahte buot guhtta bellodatstivrra  leat dál dohkkehan ovttasbargošiehtadusa vuossárgaeahkeda. Guovddášbellodaga Jon Erland Balto šaddá sátnejođiheaddjin ja Odd Erik Solbakk várresátnejođiheaddjin, muđui leat viiddidan ovdagotti viđa áirasis čieža áirasii, guđešjoavkkus lassin sátnejođiheaddjái ja várresátnejođiheaddjái leaba  Viktoria Nilsen (Guovddášbellodat) ja Monica Balto (Gurutbellodagas) ovdagotti áirasat. Eará áirasat leat gullevaččat Bargiidbellodahkii. 

– Lean hui duđavaš go mii leat ožžon  čuoggáid vuođđodokumentii mat leat leamašan váttes gažaldagat . Mii  leat ožžon dan politihka maid leat lohpidan válgaprográmmas, dadjá Odd Erik Solbakk. Duorastaga golggotmánu 10. beaivvi vuođđudit  Deanu ođđa gielddastivrra.

Ii duostta vel illudit

Jon Erland Balto ii loga vel duostat oalát illudit, ja čujuha ahte lea gielddastivrra duohken loahpalaččat mearridit.

– Vuorddán illudit duorastahkii, muhto dál goit orru hui buorre, lohká son.

Posišuvnnat juhkkon

Posišuvnnaid leat maid juohkán, ovtta váldolávdegotti juohkán ja ovtta leat sihkkon.

Ovddádusbellodaga Morten Blien lea kultur-, skuvla- ja bajásšaddanlávdegotti jođiheaddji. SG Sigurd Haugen dearvvašvuođa- ja fuolahuslávdegotti jođiheaddji, Gurutbellodaga Børre Børresen lea ealáhuslávdegotti jođiheaddji. Hápman- ja biraslávdegoddi lea sirdon ealáhuslávdegoddái. 

– Die leat deháleamos rievdadusat, lassin ahte mii leat viiddidan ovdagotti čieža áirasii. Ovdagoddi lea deháleamos politihkalaš lávdegoddi gos čađaha politihka, dadjá Jon Erland Balto (Guovddášbellodat).

– Buorre politihkka

Son lohká dassážii leamašan buori ovttasbargovuoiŋŋa joavkkus, ja illuda viidásat ovddasbargui.

– Jus ovttasbargovuoigŋa lea nu go lea leamašan, de šaddá hui buorre politihkka Deanus, lohká Jon Erland Balto. Son muitala ahte vuosttaš bargu dál, go besset fápmui, lea geahčadit gieldda siskkáldas virgeproseanttaid ja fállagoahtit ollesvirggi olbmuide. Seammás galgá sámegieloahpahus buot Deanu skuvllain. 

– Ealáhuspolitihkka lea hui dehálaš oassi min politihkas. Mis Deanus leat nanna ealáhusat ja mii fertet daiguin ovttasbargat ásahit eambbo bargosajiid, dadjá Balto. 

Sigurd Haugen mielde

Guđešjoavkku ovttasbargit leat Deanu Sámelistu, Guovddášbellodat, Olgešbellodat, Ovddádusbellodat, Gurutbellodagat ja Sigurd Haugen, guhte lea gullevaš SG:i, muhto lea dieđihan iežas sorjjaskeahtes áirrasin. Jon Erland Balto muitala ahte SG-stivra ii leat dohkkehan ovttasbarggu, muhto lea ilus go lea ožžon Sigurd Haugena iežas jovkui.

– Vaikko lea hui buorre SG-politihkka, de ii leat SG-stivra dohkkehan ovttasbarggu. Sigurd Haugen lea sorjjaskeahtes áirras, lohká Jon Erland Balto.

- Advertisement -