-Almmuhus-
OĐĐASATJohtolatlihkohisvuođat, promillavuodjin ja narkotihkaduogušteapmi

Johtolatlihkohisvuođat, promillavuodjin ja narkotihkaduogušteapmi

-

-

Maŋimuš jándora leamaš Finnmárkku ja Romssa politiijain iešguđetlágan barggut. 

Mannan bearjadaga váldui badjel 20-jahkásaš dievdu gitta Deanus go galgá leat geavahan ja vurkkodan narkotihka.

Son luitojuvvui fas luovus maŋŋel gažadeami, dieđihit Finnmárkku politiijaguovllu Twitter siiddus. 

 

Vujii gárrenoaivvis

Sotnabeaivvi čuovganeapmái ges bissehuvvui muhtin 35-jahkásaš dievdu Girkonjárggas.

Su balahit vuodján biillain gárrenoaivvis. 

 

Johtolatlihkohisvuođat

Sihke Finnmárkku ja Romssa politiijaguovlluin dieđihit johtolatlihkohisvuođaid dáhpáhuvvan ievttá eahkeda rájes. 

Mannan ija vujii muhtin biila badjel luotta máttabealde Silisávžži, Álttá suohkanis.

Ii okta ge roasmmohuvvan lihkohisvuođas.

Politiijat dieđihit ahte báikkis lea njaláhas ja ahte guovllus ledje hejot bolton muohtaga. 

 

Guovttis buohccevissui

Romssa gávpotguovddážis ges beaškkehii biila oktii bussiin maŋŋit lávvardat eahkeda.

Guokte olbmo geat leigga biillas dolvojuvvuiga UNN buohccevissui iskkadeapmái.

Politiijat jáhkket ahte biilavuoddji rihkkui vuordingeatnegasvuođa go lihkohisvuohta deaividii. 

 

Sisagaikun

Romssa politiijat dieđihit Twitteris ahte leat váldán guokte olbmo gitta maŋŋel sisagaikumiid ja suoládemiid sotnabeaivvi eahkeda. 

Álggos gávnnahalaiga suollagat go vikkaiga gaikut sisa muhtin garášii Tomasjord gávpotoasis.

Dakka maŋŋel suoládeigga gálvvuid muhtin buvddas, muhto válduiga gitta go buvddas darvehedje sudno videobáttiide. 

 

Ohcet dievddu 

Romssa politiijat dieđihedje badjel 20-jahkásaš dievddu láhppon juovlamánu 19. beaivvi.

Sihke politiijat ja dievddu bearaš leat ohcamin su.

Dál ávžžuhit Finnmárkku politiijaguovllus maiddái dieđihit jus soames oaidná 2003-mállet silba Mercedes C180.

Biillas lea ZT 38846 registrerennummir.

 

Luovosbeatnagat 

Guovdageainnus muittuhit politiijat ahte beanaeaiggádiin lea ovddasvástádus bearraigeahččat iežaset beatnagiid.

Politiijat leat ožžon dieđu ahte márkanis ruhttet beatnagat luovus ja ahte muhtimat leat vašánat. 

 

-Almmuhus-