Riddu Riđđu-festiválas lea ođđa beaivválaš jođiheaddji.
Frode Haugstvedt Henriksen lea virgáduvvon álgoálbmotfestivála Riddu Riđu beaivválaš jođiheaddjin, dieđiha festivála preassadieđáhusas.
– Go ožžon vejolašvuođa bargat Riddu Riđus, de in oba eahpidan ge. Riddu Riđus lea earenoamáš sajádat go lea deháleamos deaivvadanbáiki Norgga festiválaid searvvis. Doppe ii leat dušše viiddis ja gelddolaš kulturprográmma, muhto lea dehálaš lávdi álgoálbmotáššiid diehtojuohkimii ja digaštallamiidda. Lea hui gelddolaš ja árvvolaš bargu beassat leat mielde ovddidit festivála, ja mun illudan searvat dasa, dadjá Henriksen preassadieđáhusas.
Su ovddasvástádus lea festivála beaivválaš doaibma ja hálddahus, ja ovddidt festivála ruđalaš rámmaid ja guoddevašvuođa. Stivrrajođiheaddji Bente Ovedie Skogvang illuda oažžut Henriksena mielde jovkui.
– Sus lea buorre gelbbolašvuohta ja hárjáneapmi. Dasa lassin lea son čeahppi ovttasbargat earáiguin, fuolahit, oaidnit ja beroštit eará olbmuid, muitala Skogvang.
