Sami Grill jođihii eanet biepmu go lei vuordán rahpanbeaivvis ikte.
Sami Grill jođihii eanet biepmu go lei vuordán rahpanbeaivvis ikte.
Diibmá čálii Ávvir Johan Aslak Logje birra gii osttii kebabvovnna ja plánegođii álggahit sámi grill:a ja vuovdit sámi biepmu.
Dál lea ollašuvvan plánaid mielde, ja son rabai ikte luoddagievkkana Ráissas. Biebmu maid ráhkada lea vuššonbiergu liemain, bohccobiergoburger ja bohccobiergokebab mas jokŋabuoŋus.
– Mis lea eallu Ráisduoddaris. Buot biepmut maid mii vuovdit lea bohccobierggus ráhkaduvvon iežamet ealus, lohká Johan Aslak Logje gii lea sihke koahkka ja jođiheaddji Sami Grill ja Sami Shop gávppiin.
Buorre johtu
– Rahpanbeaivvi ikte jođihin buot ovdal go giddejin gievkkana, nu ahte lei albma buorre álgu, muitala Logje Framtid i Nord:ii.
– Ihttin ferten duppalastit, lasihastá.
Geahččalanortnet
Sami Grill lea vuos ain geahččalanortnet juovllaid rádjai.
– Mis lea rabas grilla juohke beaivvi juovllaid rádjai. Lean ieš koahkka ja jođihan Sami Grill:a, muhto jus čájehuvvo ahte lea buorre johttu ja ollu bargu de ferten gal virgádit vel nuppi olbmo, lohká Logje.
