Øyvind Klemetsen Bøthun adjánii dušše diimmu ja 40 minuhta duolbmut sihkkeliin Mieronis Mázii lávvordaga. Lágideaddjit leat movttegat go dálkediehtu ii doallan deaivása go Bingesrittet fas lágiduvvui.
Øyvind Klemetsen Bøthun adjánii dušše diimmu ja 40 minuhta duolbmut sihkkeliin Mieronis Mázii lávvordaga. Lágideaddjit leat movttegat go dálkediehtu ii doallan deaivása go Bingesrittet fas lágiduvvui.
Bingesritt sihkkelastingilvvus ledje 170 sihkkelastti mielde lávvordaga. Dálki šattai buoret go dálkedieđáhus čájehii, ja luodda lei buorre goike geasi dihte.
– Lea illudahtti go ledje nu máŋga nuorra oasseváldi dán jagáš gilvosihkkelastimis, nu ahte rekrutteren lea doaibman bures, dieđiha Bingesrittet preassadieđáhusas lávvordaga, maŋŋel gilvvuid.
– Mokta loktana
Vaikko čieža jagi lea golihan dan rájes go vuosttaš sihkkelastin lágiduvvui, de leat ain sihkkelastit geat vuohččan servet sihkkelastimiidda.
– Go oaidnit daid máŋga ovddeš oasseváldiid searvame jagis jahkái, geat lohket buriid vásáhusaid maŋŋel sihkkelastima, de loktana mokta boahtte jagi sihkkellágideami birra jurddašišgoahtit, lohká sihkkelastingilvvu jođiheaddji Marit Helene Eira.
70 eaktodáhtolačča
Maŋemus jagiid lea lágideaddji deattuhan eaktodáhtolaččaid ja lágidan sierra sihkkelastima sidjiide ja skeŋken fiinna vuoittuid. Dán jagi ledje 70 eaktodáhtolačča mielde lágideamis, mii čájeha stuora ja stabiila joavkku geat addet buriid vásáhusaid oasseváldiide, čállá lágideaddji preassadieđáhusas.
