Norgga árktalaš universitehta UiT ja Finnmarksløpet leat ođastan šiehtadusa.
UiT rektor Dag Rune Olsen ja Finnmarksløpet beaivválaš jođiheaddji Birgit Haugland leaba soahpan joatkit ovttasbarggu.
– Mii leat ilus go beassat joatkit dainna buriin ovttasbargguin, dadjá Olsen preassadieđáhusas.
Eurohpá guhkimus beanagilvu
Finnmarksløpet lea ge Eurohpá guhkimus ja garraseamos beanagilvu mas lea juohke jagi vuolgga ja moalla Álttás. Jagi 2014 rájes lea ge UiT leamaš váldoovttasbargoguoibmi Finnmarksløpet gilvvus mii lea dehálaš oahppansadji UiT studeanttaide. Dál leaba ge rektor Dag Rune Olsen ja beaivválaš jođiheaddji Birgit Haugland ođastan šiehtadusa.
– Finnmarksløpet lea dehálaš Davvi-Norgii ja lea maid dehálaš oahppu min olgoáibmodoaibma-, mediabuvttadan- ja mátkeealáhusstudeanttaide, dadjá Olsen.
Finnmarksløpet beaivválaš jođiheaddji Birgit Haugland lea maid hui duhtavaš ođđa šiehtadusain.
– UiT lea mielde lokteme Finnmarksløpet go iežaset áŋgiruššamiin, máhtuin ja oassálastimiin juo ráhkkanan dási rájes gitta lágideapmái, dadjá Haugland preassadieđáhusas.
