Dávvet Bruun-Solbakk oaččui manan vahkkoloahpa riikkačoahkkimis luohttámuša viidáset jođihit sámi nuoraidsearvvi Noereh.
Dávvet Bruun-Solbakk oaččui manan vahkkoloahpa riikkačoahkkimis luohttámuša viidáset jođihit sámi nuoraidsearvvi Noereh.
Sámi nuoraidsearvi Noereh lágidii riikačoahkkima mannan vahkkoloahpa Njávdámis, Mátta-Várjjagis.
Ledje 40 nuora boahtán olles Norggas, nu go Mátta-Várjjagis, Guovdageainnus, Evenáššis, Kárášjogas, Álttás, Romssas, Gáivuonas, Mussiris, Ivgus, Plassjes, Troandimis, Oslos ja Vestfoldas.
Doarjut nuortalašsámiid
Riikkačoahkkima oktavuođas lágidedje maid seminára Piõgg nuõrttjest (bieggá nuortan), mii lea nuortalaš sámiid historjjá ja kultuvrra birra.
Oasseváldit besse finadit Ä´vv Saa´mi Mu´zei, ja gullat eanet nuortalašsámiid dili birra ja boahtteáiggi birra nuortalašsámi oasseváldis Veikko Feodoroff. Besse maid oahpásmuvvát ja geahččalit nuortalaš sámi musihkkaárbevieru leu´dd.
– Nuortalaš sámi biras dárbbaša eanet doarjaga. Mis galgá leat lagas oktavuohta nuortalaš sámiiguin ja servviiguin, ja earáiguin geaid leat deaivvadan dán vahkkoloahpa áššiiguin movt mii sáhttit buoremusat veahkehit, lohká Dávvet Bruun-Solbakk preassadieđáhusas.
Joatká nuoraidsearvvi láidesteaddjin
Riikkačoahkkin válljii maid ođđa stivrra Noereh searvvis. 22-jahkásaš Dávvet Bruun-Solbakk oaččui ođđasit luohttámuša ja joatká Noereh jođiheaddjin.
Muđuid lea Noereh stivrras vuosttaš nubbinjođiheaddji Elen Ravna (22) Romssas/Tråantes eret, ja dat nubbi nubbinjođiheaddji Alfred Mikkel Kuoljok (18) Divtasvuonas eret.
Stivralahtut leat Eivind Yrjan Stamnes (19) Tønsbergas eret, Magnus Storvoll Strømseth (22) Romssas eret, Ellinor Skartland (15) Deanus eret, Jenny-Krihke Danielsen Bendiksen (17) Plassjes eret.
Várrelahttun leat Maria Grensemo (21) Oslo/Namsskogan, Aslak Heika Bjørn Hætta (25) Girkonjárga, Madelen Markussen (17) Skánit .
#Sápmitoo
Golbma resolušuvnna dohkkehuvvojedje, lassin doaibmaplánaide, politihkalaš višuvnna ja bušeahta ektui.
Resolušuvnnat mat dohkkehit sámi galbema Mátta-Várjjagis, bissehit bieggamillohuksema Fuovssus ja #Sápmitoo mii guoská seksualálaš loavkašuhttimiidda sámi servvodagas. Searvi lea maid dohkkehan ehtalaš njuolggadusaid searvi miellahtuide ja luohttámušolbmuide.
– Noereh galgá leat searvi mas nuorat dovdet oadjebasvuođa, ja áigu leat njunnošis barggus vai sámi searvvit sáhttet váldit seksualálaš loavkašuhttima ja dieđiheddjiid duođasin, loahpaha Bruun-Solbakk preassadieđáhusas.
