Joar Nango arkitektuvrabiblioteka Girjegumpi galgá čájáhussii davviriikalaš paviljongii Veneziabiennalas 2023:s.
– Dat mii lea Joar Nango dovdomearka lea ahte sihke dáiddárat ja geahččit bovdejuvvojit prošeavttaid sisa. Leaš go váikkuhit dáidaga dahje dušše suohtastallat dollagáttis. Nu lei go Girjegumpi galledii Nationálamusea, ja nu šaddá várra Venezias maid. Lea dušše sávvat lihkku ja illudit, dadjá Nationálamusea direktevra Karin Hindsbo.
Davviriikkalaš paviljonga arkitektuvrabiennalas Venezias ovddasta Norgga, Ruoŧa ja Suoma. Boahtte jagi lea ruoŧa ArkDes geas lea kuráhtorovddasvástádus. 18. biennala boahtá leat miessemánu 20. beaivvis skábmamánu 26. beaivái boahtte jagi.
