-Almmuhus-
-Almmuhus-
-Almmuhus-
OĐĐASATJienastivččen IN ...muhto doahttalan min álbmoga maid mearridit

Jienastivččen IN …muhto doahttalan min álbmoga maid mearridit

-

-

Sámesoahpamuš evttohus galgá dohkkehuvvot, muhto suomabeale Sámedikkis eahpidit galget go dohkkehit. Várrepresideantta ii dohkkehivčče šiehtadusevttohusa nu go dál lea, muhto son lohká doahttalit sámiid maid sii mearridit.

Norgga, Suoma ja Ruoŧa sámedikkit leat loahpalaš sámekonvenšuvnna šiehtadusevttohusa ožžon maid galget gieđahallat ja loahpalaččat dohkkehit.

Guovddaš gažaldat konvenšuvnna dáfus lea iešmearrideapmi.

Suoma sámedikki várrepresideanttas, Tuomas Aslat Juusos, lei sáhkavuorru sámekonferánsa nuppi beaivvi čoahkkimis.

 

Ii dohkkehivčče

Maŋŋel sáhkavuoru son lei áibbas čielggas sámekonvenšuvnna áššis.

– Nu go dál lea konvenšuvdna hábmejuvvon, de in mun dohkkehivčče dan. Lea dehálaš namuhit ahte mii leat suoma sámedikkis bidjan proseassa johtui, gos sámi álbmot galgá leat mielde dohkkehit dan konvenšuvnna, ja dan bohtosa das mun doahttalan. Go dalle lea sámi álbmot ieš mearridan ahte dohkkehit soahpamuša nu go de šaddá dat, čilge son.

 

Ieš mearridit
Juuso čilge ahte nu go dál lea soahpamuš evttohuvvon, de lea earret eará doppe čuokkis man lea váttis dohkkehit, ja dat lea ahte stáhta galgá mearridit gii lea sápmelaš ja gii ii.

– De ii leat šat iešmearrideapmi. Vaikke vel daddjo ge ahte stáhta galgá álgoálbmotjulggaštusa vuođul dan mearridit, de lihkká ii leat dat iešmearrideapmi, lohká son.

– Vaikke lea gal nu ahte jus lihkká dohkkehuvvo soahpamuš dainna čuoggáin, de leat goit sámiid ieža dan mearridan ahte stáhta oažžu dahkat dan mearrádusa gii lea sápmelaš ja gii ii, čilge son.

 

Proseassa jođus
Norgga sámedikki presideantta, Vibeke Larsen, lohka ahte lea Suoma sámediggi geat leat bargan mielde oažžut dan čuoggá ahte gii galgá sámi jienastuslohkui dohkket.

– Ipmirdan go sii dál leat jorggihan dien áššis, ja vuohtán sis lea hui fokus dasa, lohká son.

– Mii leat Norgga bealde bidjan johtui proseassa gosa galgat gulahit sámi álbmogis movt galgá hábmejuvvot šiehtadusevttohus. Ja dan gulaskuddama vuođul mii áigut geassemánus meannudit dan konvenšuvnna, muitala Larsen

 

 

 

-Almmuhus-