-Almmuhus-
GUOIMMUHEAPMIJienas govvagilvvu vuoiti

Jienas govvagilvvu vuoiti

-

-

Dál álgá #avvirgeassi loahppagilvu, mii bistá bearjadahkii. Fina geahččamin govaid. Jienasteapmi lea loahpahuvvon.

Ávvir lea dán geasi lágidan govvagilvvu, birrasiid 230 gova leat ožžon gilvui. Eatnašat leat juohkán daid Instagram bokte, muhto muhtimat leat maid sádden midjiide govaid e-poastta bokte.

Mii háliidat giitit buohkaid geat leat searvan gilvui ja čájehan midjiide iežaset geassedoaimmaid, dáppe beasat geahččat govaid maid min lohkkit leat juohkán e-poastta ja instagram bokte.

 

Gilvoáigodagas vahkkosaččat vuorbádan ovtta gova mii beassá mielde loahppagilvui, dasa lassin leat mii válljen guhtta gova mat maid besset viidáseappot. Lei máilmme váttis válljet govaid loahppavurrui. Bearjadaga  almmuhat guđe gova min lohkkit leat jienastan vuoitin.

Vuoitu lea smávva govvenapparáhtaš.

 

Dás oainnát govaid mat leat mielde, dáid gaskkas galget min lohkkit jienastit vuoiti. (Jienasteapmi giddejuvvui borgemánu 7. beaivvi diibmu 15.00, dál ii leat vejolaš šat jienastit):


1. GOVVA: Marie Louise H. Lantto lea govven dán gova mii vuorbáduvvui vuosttaš vahkku vuoitin. Son lea govven nieiddaža gii čoaggá liđiid, albma fiinna geassemuitu.

 


2. GOVVA: Marit Helene Eira govvii dán gova mii vuorbáduvvui vahkku 28 vuoitin. Son lea juohkán gova mas rukses miessi njámmá álddu «Instagram» govvajuohkin neahttasiiddu bokte. Son lea vel čállán govvii «Miessemearkun Sievjjus».

 


3. GOVVA: Maret Ravna Boine lea govven dán gova mii vuorbáduvvui vahkku 29 vuoitin. Son lea juohkan čáppa gova gaskaijabeaivvážis «Instagram» govvajuohkin neahttasiiddu bokte. Govva lea govvejuvvon Grøtfjord:as.

 


4. GOVVA: John Máhtte Oskal lea govven dán gova mii vuorbáduvvui vahkku 30 vuoitin. Govva lea govvejuvvon Ráisavuonas ja das oaidnit muhtima gii vuodjá čáhceskohterin.

 


5. GOVVA: Olaug Larsson govvii dán gova mii vuorbáduvvui vahkku 31 vuoitin. Olaug lea govven Unjárgga girku ja govas oaidnit ge ahte gaskaijabeaivváš lea guođđán min ja ijat leat gerpmodišgoahtán.

 


6. GOVVA: Aili Keskitalo jugii dán gova #avvirgeassi fáddágilkoriin Instagram bokte, ja vuorbáduvvui vahkku 32 vuoitin. Sámedikkepresideanta oidno leamaš murjemin iežas isidiin.

 


7. GOVVA: Oddbjørg Hætta Sara lea sádden dán gova Ávvirii e-poastta bokte. Ná čálii son govas birra: «Dán gova lean govven Sállanis. Ledjen iežan mánáiguin ja ipmibiiguin vázzime, finaimet Nordsandfjordas (geahččame bákteráiggi gos evakko áigge orro 133 olbmo ovdal go gávnnahalle duiskkalaččaide). Lei mailmme čáppa beaivi. Vulos gal manai bures vázzit, muhto ruovttoluotta lei veaháš lossat. Lagamusas lea váhkar, 3 1/2 jahkásaš, ja searra vázzit. Dan gal ledje boarraset mánát maid, manne measta njuikku.
Ávvira mielas dát govva lei čáppat ja čájehii ovtta dain moatti liehmubeivviin mat dán geasi ledje. Olmmoš boahtá erenoamáš miellaláhkái go dán gova geahččá, danne válljiimet dán mielde loahppagilvui.

 


8. GOVVA: Anne Madeleine Hætta maid lea sádden dán gova e-poastta bokte Ávvirii. Son ii leat čilgen gova birra maidege, muhto Ávvir lea válljen dán mielde loahppagilvui. Govva čájeha ahte lea sevnnjodišgoahtán Sámis fas. Dán geasi lea unnán arván, vaikke leage čoaskkis leamaš. Anne Madeleine lea govvestan rásiid arvin, ja govva lea čábbát komponerejuvvon.

 


9. GOVVA: Dán gova lea Silja Somby juohkán Instagram bokte. Govvii lea son čállán čuovvovaš fáddágilkoriid mat Ávvira mielas bures govvejit dien čalbmerávkalanbottu go govva lea govvejuvvon: #gollenieida #gálašeamen #lávggodeamen #beantabáhkka #dearestdaughter #beachlife #almosthot #guovdageaidnu #sápmi #avvirgeassi. Min mielas govve dát bures dán geasi, olbmot doapmalit johka-, jávre- dahje mearragáddái dalán go veahá ge firte, liikká oidnojit bálvvat duogábealde mat muitalit ahte báhkat eai dáidde bistit. Muđuid maid vuogas go lea govven máná allodagas.

 


10. GOVVA: Dán gova man mii leat válljen loahppagilvui mielde, lea Anne Karen Sara govven miessemearkumiin. Gova lea son juohkán Instagram bokte, ja min mielas dát lei somás govva go miessi lea čielggas ja duogáš ges seađas, čájeha ge ahte boazoeaiggádii lea miessi guovddážis dáid muttuid.

 


11. GOVVA: Marit Meløy Utsi lea govven dán gova ja juohkán dan Instagram bokte. Vaikke leage geassi ja gaskaijabeaivváš, de oaidnit ahte lea dan mađe čoaskkis ahte fahcat gal atnojit. Liikká mánát leat movttegat. Dát bures govve dán geasi.

 


12. GOVVA: Marit Kirsten Eira dat lea govven ja juohkán dán gova Instagram bokte. Go lea čoaskageassi de ferte eará doaimmaid fuomášit go gálašit, olusat válljejit de oaggut. Ja hávgabivdu dáidá leat somá, go guolit nu stuorrát ahte maŋis vel gessojit go bivdi vázzila.

 

 

 

 

 

-Almmuhus-