Diibmá dálvet bođii eambbo muohta go dábálaččat Romssa ja Finnmárkku jihkiide. Geasset ges sudde jiehkit eambbo go dábálaččat.
– Buot jiehkit maid mii áicat leat suddan dan maŋemus 20 jagi, dadjá Norgga čáhce- ja energijadirektoráhta glasiologa Hallgeir Elvehøy preassadieđáhusas.
Son lohká jiehkit leat suddan go áiggi badjel lea gesiid suddan eambbo muohta ja jiekŋa go maid dálvet nagoda borgga bidjat.
Dán jagi leat Romssas ja Finnmárkkus njealje jiehki mat leat gaskkamearalaččat 30 mehtera suddan. Jiehkki mii lea eanemus suddan lea Láhpis.
