Finnmárkku Fágalihttu ballá fylkka ambulánsagirdiášši šaddan fápmogilvun, ja ávžžuha Davvi Dearvvašvuođa baicca jurddašit finnmárkolaččaid dorvvolašvuođa birra.
Finnmárkku Fágalihttu ballá fylkka ambulánsagirdiášši šaddan fápmogilvun, ja ávžžuha Davvi Dearvvašvuođa baicca jurddašit finnmárkolaččaid dorvvolašvuođa birra.
Leat boahtán ollu moaitagat dasa go Davvi Dearvvašvuohta lea mearridan heaittihit ovtta ambulánsagirdi Finnmárkkus ja dan sadjái bidjat jetgirdi mii doaibmá Romssa bokte. Sihke fágaolbmot nugo girdibuohccidivššárat, suohkandoaktárat, doavttirsearvi, eará dearvvašvuođabargit ja maiddái Finnmárkku buohcciviessu leat moaitán plánaid.
– Orru áibbas ipmirmeahttun go Davvi Dearvvašvuohta čuoččuha šaddá oppalaččat buoret girdiambulánsafálaldat maiddái Finnmárkui. Jetgirdi, mii galgá boahtit dálá ambulánsagirdi sadjái, han ii sáhte seaivut Hámmárfestii ii ge eará girdišiljuide fylkkas, dadjá Fágalihtu jođiheaddji Bjørg Tapio preassadieđáhusas.
– Sihkarvuohta hedjona
Son muittuha Finnmárkkus leat guhkes gaskkat ja olbmot orrot bieđgguid, ja go leat olu oanehisgirdišiljut, de ii leat jetgirdi maid sii dárbbašit Finnmárkkus.
– Ođđa mearrádus hedjonahttá álbmoga sihkarvuođa Finnmárkkus. Orru dego Finnmárku galgá gillát vai Svalbárddas besset buoridit gearggusvuođa, oaivvilda Tapio.
Čohkkeme vuosttaldit
Tapio sávvá ahte Finnmárkku politihkkárat ovddidivčče ášši fárrolaga nugo Sosialisttalaš gurutbellodaga jođiheaddji Kristi Bergstø Finnmárkkus livččii oččodeame. Bergstø hástá eará bellodagaid fárrui sáddet oktasaš reivve dáinna ávžžuhusain Davvi Dearvvašvuhtii. Finnmárkku stuoradiggeáirasat Sosialisttalaš Gurutbellodagas ja Bargiidbellodagas leat maid vuosttaldan evttohusa.
– Váldet fágaolbmuid rávvagiid duođalaččat, go sii vásihit dáid hástalusaid beaivválaččat. Allet dán divtte šaddat fápmoáššin, čállá Tapio preassadieđáhusas.
